Sońǵy ýaqytta tánin saýdalaıtyn erkekter sany kúrt artqan,- dep habarlaıdy «Adyrna» ulttyq portaly Eýrazııa-1 arnasyna silteme jasap. Saýdanyń bul túrimen er azamattar kóbinese áleýmettik jeliler men tanysý saıttarynda aınalysady eken.
«Estimegen elde kóp» degendeı, óz tánin satatyn jigitterdiń kóbisi 18 ben 40 jas aralyǵyndaǵy azamattar. Olar ıntımdi qyzmetterine belgili bir baǵany da belgilep qoıǵan. Pandemııaǵa qaramastan, saýdanyń bul soraqy túri qarqyndy júrip jatqan kórinedi. Óz tarapymyzdan sondaı jarnamalardyń birnesheýine arnaıy habarlasyp kórip, tómendegideı jaıtqa kóz jetkizdik.
«Sizge ıntımdi qyzmettiń kez kelgen túrin jasaımyn. Bar bolǵany ýaqytty belgilep, aqshasyn tóleseńiz bolǵany. Bir saǵattyq jumysymnyń baǵasy 15 myń teńge. Al eger sizge barýym kerek bolsa, 20 myń teńge bolady», -deıdi biz habarlasqan jarnamanyń ıesi. Aty-jónin jáne baǵasy nege sonsha qymbat ekenin surap edik, « meni ózińiz qalaǵan atpen ataı berseńiz bolady. Al baǵanyń qymbattaýy naryqqa baılanysty ǵoı. Byltyr bes myń, on myńǵa jumys isteıtinbiz. Al qazir karantın, burynǵydaı klıent kóp emes. Amal joq, osylaı qymbattatýǵa týra keldi »,- dep kúldi.
Al bir saǵattyq «jumysyn» 100 dollar dep baǵalaǵan Nýrık esimdi jigit: «Men tek vip klıentterge qyzmet kórsetemin. Intımdi qyzmet kórsetýde tájirıbem óte kóp. Sodan bolsa kerek, maǵan kóbinese sheneýnikter men baıshykeshterdiń áıelderi tapsyrys beredi», -deıdi. Nýrık karantın kezinde turaqty klıentteri úılerinen shyǵa almaı qınalyp, sol sebepti osylaı jarnama berýge májbúr bolǵanyn aıtady.
Bulardan bólek, saǵatyna 5 myń teńgeni mise tutatyn jigitter de bar eken. «Sizde nege arzan?» degen suraǵymyzǵa: «Qazirgi krızıske baılanysty osylaı arzandatyp, akııa jasap otyrmyn»,- degen jaýap aldyq.
Osy máselege baılanysty áleýmettanýshy Áıgerim ASYLHAN: «Árıne, bizdiń qazaqy ustanymymyz úshin erkektiń bulaı aqsha tabýy óte uıat sanalady. Tepse, temir úzetin jigittiń jeńil jolmen aqsha tabýǵa bet burýy jaqsy nárse emes. Desek te, tán saýdasyn usynǵan erkekterdiń bul qadamǵa beker barmaıtyn tusyn da eskerýimiz kerek. Eń aldymen, mundaı saýda suranystyń nátıjesinde paıda bolǵanyn nazarǵa alaıyq.
Suranys bolmasa, qazirgideı jarnama qaptamas edi ǵoı, solaı ma? Ekinshiden, erkekti bul jaǵdaıǵa áleýmettik turmys ıtermeleýi múmkin. Qaltasynda qos dıplomy bolsa da, syrt kelbeti qansha tartymdy bolsa da, laıyqty jumys tappaı qanshama jigitter sandalyp júr. Nege? Sol baıaǵy jemqorlyqtyń saldary. Jaqsy jumysqa turý úshin kókesi ne aqshasy bolmasa, qazirgi qoǵamda óz ornyńdy tabý qıyn. Osydan keıin ne istemek kerek? Aqsha tabýdyń osyndaı jolyna qadam basady ǵoı. Desek te, tán saýdasyn qyzdyryp júrgender arasynda «erikkender» de baryn eskereıik. Qalaı bolǵanda da, qazaq qoǵamy mundaı saýdanyń túrin quptamasy anyq», -degen pikirde.
Tánin saýdalaıtyn qyzdardy «jezókshe», «jeńil júristi qyz» deıdi jurt. Al mundaı erkekterdi qalaı dep ataǵan jón? Sebebi, osyndaı da nárse bar eken, habarlaryń bar ma dep qurbylarymyzǵa suraý salǵanymyzda, kóbisi tańǵaldy, endi biri kúlkige qaryq bolysty.
«Mundaı jaǵdaı týraly byltyr estigenmin. Bir sheneýniktiń áıeli únemi osyndaı jigittermen kóńil kóterip, aqshasyn tóleıtinin qulaǵym shalyp qalǵan. Sol kezde árıne, qatty tańǵaldym. Alaıda eger kúıeýiniń densaýlyǵynda kinárat bolsa, bálkim áıelderdiń osyndaı jigitke tapsyrys bergeni de jón shyǵar. Qansha degenmen, tabıǵattyń zańdylyǵy ǵoı», -deıdi dúkende satýshy bolyp isteıtin Almagúl apaı.
Óz tánin saýdalaýǵa qatysty dindarlar qandaı pikirde degen maqsatpen naıb ımam Muhıt BAQYTULYNA habarlasyp kórdik. «Islam dininde tán saýdasy las tirlik sanalady. Lut paıǵambardyń tusynda da adamdar osyndaı azǵyndyqqa baryp, geı, lesbııanka sekildi qubylystar jıi kezdesedi eken. Sol tusta Alladan arnaıy habar jiberilip, Lut paıǵambarǵa bir túnde elin tastap, ketip qalýǵa ámir etiledi.
Paıǵambar elinen alystaǵan tusta artyna burylyp qarasa, álginde ǵana tirshiligi qyzý júrip jatqan jer kúlge aınalǵan deıdi. «Jezókshe» erkek qoǵamymyzdyń masqara tusy dep sanaımyn. Bul áreketke barýshyda da, sol qyzmetti tutynýshyda da ar uıattyń, adamı qasıettiń qalmaǵanyn kórsetse kerek. Menińshe, tamaq asyraýdyń bul túrin tańdaýdyń kúnási de jeńil bolmas. Er azamattarymyz atyna laıyq azamattyń júgin kóterýi kerek. Jeńil jolmen kelgen aqsha juǵyn bolmaıdy. Meni bir suraq qana mazalaıdy, tánin satqan aqshany úıine ákelgen erkek balasyna aqshany qalaı taptym dep aıtpaq?!
Raýana DIMAShQYZY,
«Adyrna» ulttyq portaly.
