Álemde keńinen taralyp jatqan Tık-Tok áleýmettik jelisin, onyń zııany men kemshilikterin “Adyrna” atap ótken bolatyn.
Endigi másele mynada..
Bul jelini paıdalanýshylar ózderine unaǵan ánderine saı bı bılep, nemese túrli qımyldar jasaý arqyly vıdeo túsiredi. Qazir, sońǵy kezde trendke aınalyp jatqan ol, bet-júzin kameraǵa meılinshe jaqyndatyp, mýzyka yrǵaǵyna saı basty qozǵaltý.
Jastardyń qazirgi qyzyǵýshylyǵy men túsirip jatqan beınejazbalaryna aıtar qarsylyǵymyz joq. Degenmen, oıyn – oıynymen.
Áleýmettik jelide qyzý talqyǵa túsip jatqan endigi másele, ol - Abaı Qunanbaıuly, Álıhan Bókeıhanov, Ahmet Baıtursynuly men Nursultan Nazarbaevtaı qazaqtyń uly, dana, eli úshin qyzmet etken birtýar azamattarynyń azǵyndardyń qurbanyna aınalýy.
Álıhan Bókeıhanovtyń atylar aldynda, túrmede túsirilgen sońǵy sýretimen oınaǵany Alash arystary men olardyń eńbegin baǵalaıtyn ár azamattyń ashýyna tıip otyr.
Qazaq jazýynyń reformatory – Ahmettiń, Uly aqyn -Abaıdyń, Elbasy – Nursultan Nazarbaevtyń sýretin shańyraǵymyzdyń tórine ilip qoıýdyń ornyna erikkeniń ermegine aınaldyryp, jem qylyp otyrmyz.
Alash kósemi Álıhan Bókeıhanulynyń Ahmet Baıtursynuly men Mirjaqyp Dýlatulyna jazǵan hatynan úzindi...
«Shyraǵym Ahmet! Shyraǵym Mirjaqyp! Sender qaıta-qaıta abaqtyǵa túse beresińder. Oǵan nalymańdar. Atam zamannan, Prometeıden bergi ýaqytta el úshin kúresken azamattardyń kórgeni - abaqtynyń esigi. Baıaǵyda dońyz ben aqqý dos bolypty. Dońyz sonda aqqýǵa: «Eı aqqý, sen aıtshy, kún bar deısiń, sol kúndi men nege kórmeımin» depti. Sonda aqqý: «Áı dońyz, seni Alla tómen qaratyp jaratqan. Sondyqtan, sen kúndi kóre almaısyń» depti. Shyraǵym Ahmet! Mirjaqyp! Bolashaqqa kúndi kóre alatyn urpaq kerek. Sol urpaq senderdiń attaryńdy atap, qurmet kórsetip jatsa, baqytty emessizder me!?» degen eken.
Sondaǵy kórsetken qurmetimiz osy ma? Ata-babamyz ańsap jete almaı ketken táýelsizdik ýysymyzda turǵan kezde, meılinshe esimderin ardaqtap, alǵys aıtyp, taǵzym etýdiń ornyna istep otyrǵanymyz osy. Biz Áz-Jánibek, uly Abaıdyń urpaqtary elimiz ben jerimizge qasyq qany qalǵansha eńbek etken ár tulǵanyń esimin ulyqtap, olardyń esimderin tarıhta altyn áriptermen jazylýy úshin óz yqpalymyzdy tıgizýimiz kerek.
“Atalarymen oınaǵandardy izdep, olardy jazasyz qaldyrmaý kerek” – deıdi, jeli qoldanýshylary.
Laýra TURSYNJAN,
“Adyrna” ulttyq portaly
