Rak isigine shaldyqqan Manýel Alvares qınalyspen ótetin ómirden birjola qutylǵysy keldi. Mıǵa shapqan isiktiń baryn estigennen keıin ol ózin basynan atyp ólgisi kelgen. Biraq ómirdiń ǵajaıyp qupııasy mol. Ol ózin atyp, raktan qulan taza jazylyp ketti. Senbeısiz be? Buǵan ózim de senbeımin, deıdi Kordovy qalasynda turatyn doktor hırýrg Alfanso Gonsales. Mundaı tańǵajaıyp oqıǵa mıllıard jaǵdaıdyń birinde ǵana bolýy múmkin. 9mm oq mıdaǵy isikti qurtqan, saý kletqalarǵa zaqym kelmegen.
Baqytty adam 36 jasta. Ol júrgizýshi, úsh balanyń ákesi.
– Men ólýge tıis edim, deıdi ol amerıqanyń aptalyq «nıýs» gazetiniń jýrnalısine. Qazir jaǵdaıym óte jaqsy. Eki kúnnen keıin aýrýhanadan shyǵamyn.
Doktor Gansales Alvarestiń mıynan taýyq jumyrtqasynyń kólemindeı isik tapqan. Dárigerlik saraptamadan keıin olar hırýrgııalyq jolmen isikti sylyp tastaýǵa bolmaıdy dep sheshken. Naýqasqa tek hımııalyq terapııa jasaǵan. Al hımııalyq terapııa bas aýrýyn kúsheıtip, aýrý basatyn esirtkilerdiń ózi kómektese almaǵan.
Uıqysyz túnder, jan qınaǵan aýrý Manýel Alvarestiń esin alyp, qasqyrdaı ulytyp, kúnin túnge, túnin kúnge almastyrǵan.
– Búıtkenshe óle salýdy jón kórdim. Qoshtasý hatyn jazyp, araqty túgel simirip aldym. Sodan soń tapanshany taqap, janymdy jegen azaptan qutylý úshin shúrippeni basyp jiberdim... Esimdi aýrýhanada jıdym.
– Ol endi o dúnıelik adam, dep oıladyq deıdi neırohırýrg. Bári de solaı oılaǵan. Oqty alyp, jan jaǵyn tazalaǵannan keıin, ol esin jıdy. Bul shynynda adam sengisiz oqıǵa.
Sizder osyndaı myńnan bir kezdesetin taǵdyrdyń tylsym syryna tap bolǵan jandardyń oqıǵasyn estidińizder me?
BEKZAT BOLATULY,
“Adyrna” ulttyq portaly
