Pandemııa kezinde almatylyqtardyń kommýnaldyq qyzmetterge qaryzy 2 ese ósken. Bul týraly onlaın brıfıng barysynda qalalyq energetıkalyq tıimdilik jáne ınfraqurylymdyq damý basqarmasynyń basshysy Áset Masabaev aıtty, dep habarlaıdy QazAqparat tilshisi.
«Pandemııa kesirinen jarııalanǵan TJ nátıjesinde debıtorlyq qaryzdar 2 esege artqan. Byltyrdyń ózinde turǵyndar men zańdy tulǵalardyń debıtorlyq qaryzy 2 mlrd teńge bolatyn. Bıyl 4,5 mlrd teńgege jetti. Bul kóbine pandemııanyń kesirinen bolyp otyr. Sondyqtan túsinistikpen qarap, osy baǵytta jumysty jalǵastyramyz», - dedi basqarma basshysy Áset Masabaev. Spıker qala turǵyndaryn boryshynan qutylýǵa shaqyrdy. Qalanyń energetıkalyq kesheniniń jumysy debıtorlyq qaryzdardyń ótelýine baılanysty bolyp tur.
Foto ashyq derekkózden alyndy.
