Búginde 2020-2025 jyldarǵa arnalǵan "Nurly jol" ınfraqurylymdy damytý memlekettik baǵdarlamasy júzege asý ústinde. Bul baǵdarlama boıynsha 112 ınfraqurylymdyq jobany iske asyrý qarastyrylǵan. Qazirgi tańda Nur-Sultan qalasynyń ınfraqurylymyn damytýǵa basty nazar aýdaryldy.
«Nur-Sultan qalasynyń tóńiregindegi máselelerdi sheshýge úsh jyldyq kezeńge 22,5 mlrd teńge qarastyrylǵan, osy qarajatty qala tóńireginde ómir súretin azamattardyń turmys sapasyn arttyrýǵa jumsaý qajet», - dedi Asqar Mamın.
Ótken jyly elordada uzyndyǵy 34 shaqyrym, tórt jolaqty úlken aınalma jol ashyldy. Sondaı-aq, jalpy uzyndyǵy 100 shaqyrymdy quraıtyn 150 kóshý jóndelý ústinde.
Astanany kórkeıtý jumystary turǵyndar kóńilinen shyǵyp jatyr ma? «Adyrna» ulttyq portaly surap kórdi.
Alpamys Faızolla, jýrnalıst:
- Astanamyz maǵan unaıdy. Biraq kez-kelgen shahardyń artyqshylyǵy da, kemshiligi de bolatyny ras. Nur-Sultannyń sáýleti kóz qýantady. Ásirese, túnde óte ádemi. Qalanyń ý-shýynan sharshaǵanda, kópshilik «Pıramıda» dep ataıtyn «Beıbitshilik jáne kelisim saraıynyń» artyndaǵy saıabaqqa barsań, júıkeń demalady. Bul jer úlken shahardyń ortasyndaǵy typ-tynysh bir «aral» sııaqty. Budan bólek tańerteń aýmaǵy óte úlken Botanıkalyq baqta júgirý de bir ǵanıbet. Biraq astanadaǵy barlyq saıabaqtardyń da, kóshelerdiń de kemshin tusy – aǵash azdaý. Otyrǵyzylǵan kóshetter birte-birte ósip kele jatyr. Bolashaqta Nur-Sultan toǵaıy qalyń, jasyl qalaǵa aınalý kerek. Sonymen birge, o basta aryq júıesi jobalanbaǵandyqtan, jańbyr jaýǵanda, asfalttiń beti shylqyǵan sý bolady. Aıaq kıimnen talaı sý ótken. Bul másele de sheshiledi dep seneıik. Kún ysyǵanda, keıde ózimdi qapyryq, qapas qalada akvarıýmdegi balyq sııaqty sezinemin. Jan-dúnıeń erkindikti, tabıǵatty ańsaıdy. Astana arqyly Esil aǵyp jatsa da, shahar aýmaǵynda shomylýǵa ruqsat etilgen joq. Tek bıyl ǵana ákimdik birneshe jaǵajaı ashqanmen, karantın jaǵdaıyna baılanysty ol jerler bos tur. Halyq kelesi jyly qyzyǵyn kóretin shyǵar, Alla qalasa. Meniń jumysym da, jaldap turatyn páterim de sol jaǵalaýda. Sol sebepti, ózge aýdandardyń tynys-tirshiligin egjeı-tegjeıli bilemin dep aıta almaımyn. Biraq keıde bazar mańyndaǵy jataqhanalarǵa túsirilimge barsań, jurt adam shoshıtyn deńgeıde ómir súrip jatqanyn kóresiń. Sonymen birge, talaı stýdent ýnıversıtetten jataqhana ala almaı, páter jaldaýǵa májbúr bolatynyna kýá bolyp júrmiz. Bul áli oqýyn bitirmegen jastarǵa da, olardyń ata-anasyna da aýyr. Sol sebepti, Nur-Sultanda halyqty jaldamaly, sapaly jataqhanalarmen qamtamasyz etý máselesi sheshilse jaqsy bolar edi. Jalpylaı alǵanda, astana unaıdy. «Kósh júre túzeledi» demekshi, shahar kemshilikterden birte-birte aryla jatar.
Aıman Joldy, muǵalim:
- Astanada turyp jatqanyma 15 jyldyń júzi boldy. Elimizdegi eń ádemi qala desem, artyq aıtpaǵanym shyǵar. Maǵan «Prezıdenttik park» óte qatty unaıdy. Aýmaǵynda jasandy aǵyndar, sýburqaqtar men gúlzarlar bar. Bul jerge otbasymyzben jıi kelip turamyz. Jalpy Nur-Sultandy kórkeıtý jumystary joǵary deńgeıde júzege asyrylýda.
Azamat Murat, ınjener:
- Astana jyldan-jylǵa kórkeıip jatyr. Nur-Sultan qalasynyń arhıtektýralyq kórinisi Shyǵys pen Batystyń mádenı dástúrlerin beıneleıtin arnaıy eýrazııalyq stılde jasalǵan. Maǵan sáýletshi Aqmyrza Rústemovtyń týyndysy «Báıterek» monýmenti unaıdy. Basshylyqqa jol máselesine basa nazar aýdaryńyzdar dep aıtqym keledi.
Sálıma Qalqabaı, kópbalaly ana:
- Barlyq Qazaqstannyń qalalary ózinshe ádemi, sulý da erekshe ! Astana - jas qala , birte -birte ósip kele jatqan qala.Erekshe unaıtyn jerleri - Jeruıyq saıabaǵy, Muhıtaral jáne Pıramıda. Dese de, oń jaǵalaýdyń ádemirek ekenin aıta ketken jón. Qurylys obektilerin sol jaǵalaýǵa da kópteý salý kerek.
«Adyrna» ulttyq portaly
