Qazaqta «Kórshi aqysy – táńir aqysy» degen jaqsy sóz bar. “Alystaǵy aǵaıynnan jaqyndaǵy kórshiń artyq”, “Aǵaıynnyń aty ozǵansha, aýyldastyń taıy ozsyn”. Bul tirkesterden qazaq ómirinde kórshiniń orny qanshalyqty salmaqty ekenin ańǵarýǵa bolady. Jahandaný dep janymyzdaǵy kórshimen aralasýdy umytyp ketpedik pe? Endeshe, kórshige qatysty bilip júrýińiz abzal bolatyn dúnıelerdi eske túsireıik. Kóregendi kórshi bolsańyz myna ÚSh ZATTY suramańyz. Olar:
1.TUZ
Meılinshe dúkennen satyp alýǵa tyrysý kerek. Eger alyp kelýge múmkindik bolmasa kórshiden alǵan tuzǵa az bolsa da aqy tóleńiz. Óıtkeni tuzda bereke bar. Siz onyń tuzymen qosa, berekesin de alyp ketýińiz múmkin. Sondyqtan da ózińiz bireýden tuz almańyz, bireýge tuz bermeńiz.
2.AQY
Eger kórshińiz sizdi kómekke shaqyrsa, ony jasap bergenińiz úshin aqy suramańyz. Keıde esigi buzylyp nemese balasy qaraýsyz qalyp jatady. Osyndaıda eń aldymen kórshiden kómek alady. Sol kezde ýaqytyńdy aldym dep kórshi aqsha usynady. Ózgege de beretin edim ǵoı, alshy dep qıylatyndar da kezdesedi. Sol kezde sypaıy túrde bas tartý kerek. Óıtkeni kúnderdiń kúnindesiz de kórshiden kómek suraısyz. Sonda jarqyn júzben kórshińizdiń esigin qaǵa alasyz.
3.IT
Keıde kórshiniń ıti balalap jatsa, tuqymy jaqsydep ıttiń kúshigin asyrap alǵysy keletinder bolady. Bul kezde de kórshimen aradaǵy qarym-qatynasqa syzat túsirmeý jaǵyn umytpaý kerek. Saltty biletin kórshi bolsa, kúshikti satyp alý yrymyn jasaıdy. Al bilmeıtinderge túsindirýge tyrysyńyz. Qarapaıym nárse ǵoı dep elemeýińiz múmkin. Bir-birine kúshik bermeý kórshilerdiń ıtteı yryldasyp qalmaýynyń amaly.
Atadan kele jatqan kez kelgen tyıymnyń astarynda tereń mán jatady. Keıbiri aqylǵa qonymsyz bolsa da, árbir yrym ómirge mánbitirýge umtylady. Qazaq urpaǵyn tyıym arqyly tárbıelegenin tarıhtan bilemiz. Qıssa, dastandardyń da mańyzy osynda.
Aıaýlym ÁBILDA,
“Adyrna” ulttyq portaly
