Júgirý – adam densaýlyǵyna paıdaly, deneni shynyqtyryp, metabolızmdi retteıtin, tózimdilikke bıimdep, júrekti jaqsartatyn jeńil sporttyń túri. Arnaıy jattyǵý zaly men trenajerlerdi qajet etpeıtin bul sportqa qyzyǵyp, uzaq qashyqtyqqa júgiretin marafonshylar jyl saıyn kóbeıip keledi.Tipti, «trendke» aınalǵandaı. Kásibı marafonshylardy qarapaıym jandar arasyndaǵy bul tendenııa alańdatyp ta keledi.Olardyń ýáji – bir qaraǵanda, óte jeńil sport kóringenmen, júgirýdiń de bolmashy qaǵıdalaryn saqtamaýdan densaýlyqqa orasan zor zııan kelýi múmkin. Sondyqtan júgirýge de asqan yjdahatpen qarap, jaqsy nátıje kórsetý úshin keıbir qaǵıdalardy qaperde ustaǵan jón.
Eger siz uzaq qashyqtyqty baǵyndyryp, marafonnyń medaline qol jetkizgińiz kelse, myna keńesterdi jadyńyzda saqtańyz:
Durys tamaqtanyńyz. Eger aýzyńyzdy tyımasańyz, artyq salmaq jınap, sonyń saldarynan aıaǵyńyzǵa kóp kúsh túsip, tabanyńyzdy zaqymdaısyz, sońy artrozǵa ulasady. Júgirýdi bastamas buryn salmańyǵyz ben boıyńyzdyń sáıkestigin tekserip alyńyz. Artyq salmaqty sezinsezińiz, tezirek arylýǵa tyrysyńyz. Kúnine az-azdan jıi tamaqtanyp turyńyz. Salmaqpen aıtarlyqtaı problemańyz bolsa, maman keńesine júgingenińiz jón. Sondaı-aq júgirerden birneshe saǵat buryn tamaqtanyńyz. Tamaq ábden qorytylýy tıis. Qorytylmaǵan tamaq sizdi ábden ábigerge salyp, qozǵalysyńyzdy qıyndatady.
Bulshyq etterińizdi daıyndańyz. Deneńizge kúsh túsirmes buryn ony jaqsylap qyzdyryp, daıyndap alǵanyńyz jón. Júgirgen sátte siz tek aıaqpen ǵana jumys istep qoımaı, tutas deneńizdi qozǵaltatynyńyzdy este saqtańyz. Birneshe ret otyryp-turyńyz, aıaqpen kóbirek jattyǵý jasańyz, sekirińiz, plankaǵa turyńyz, otjımanııa jasańyz. Fızıkalyq jattyǵýlardy kóbirek oryndap, aıaqtan basqa, bel, qol, arqańyzdyń da jumysyn jaqsartyp alyńyz.
Baıaý júgirińiz. «Álin bilmegen – álek» demekshi, áýeli qashyqtyqty kózdep, oǵan jetkenshesharshap qalmaýdyń qamyn jasańyz. Júgirýdi bastaǵan alǵashqy 2-3 aıda jyldamdyqty qospaı, baıaý júgirgenińiz abzal. Sebebi, sizdiń júrek-qantamyr júıeńiz, tirek-qımyl apparatyńyz birden aýyr qozǵalysty qabyldaı almaıdy. Tynysyńyzdyń durystyǵyn baqylańyz. Eger entigip, demalysyńyz qıyndasa, dereý jyldamdyqty báseńdetińiz.
Aıaq kıimdi durys tańdańyz. Júgirýge arnalǵan aıaq kıim alyńyz. Basqa sport túrine arnalǵan nemese belgili brendtiń kóshirme úlgisisizge yńǵaısyzdyq týdyrýy ábden múmkin. Sol sebepten aıaq kıimge asqan kirpııazdyqpen qarańyz. Aıaq kıiimińiz sizdiń tabanyńyzǵa sáıkes kelýi kerek. Júgirgen sátte aıaq isip, tyrnaqtar tirelipqap, batatyny bar, sol sebepti jarty ólshemge úlkenin alǵanyńyz jón.
Eń bastysy – eshqashan tolyq daıyn bolmaı, marafonǵa qatyspańyz. Ózińizdi aınalaǵa batyr qyp kórsetýdiń esh keregi joq. Sebep – marafon bolmashy qatelikterdi keshirmeıdi.
Aıjan QURMANBAI,
«Adyrna» ulttyq portaly
