«Prezıdent myrza, úıimizdi jappańyzshy..» (vıdeo)

2085

«Adyrna» ulttyq portalyna balalar úıiniń tárbıelenýshileri habarlasyp, óz aryzdaryn aıtty. Olar elimizdegi jalǵyz memlekettik balalar úıiniń jabylýyna qarsy. Esterińizge sala ketsek, buǵan deıin departament «Balalar úıin ınstıtýtsyzdandyrý jáne oqýshylar sanynyń turaqty tómendeý úrdisi úshin 2020 jyldyń tamyz aıynda Almaty qalasyndaǵy №1 balalar úıin jabý josparlanýda. Jabylǵan jaǵdaıda tárbıelenýshiler SOS balalar aýylynyń úkimettik emes bilim berý mekemesine aýystyrylady»,degen málemdeme jasaǵan bolatyn. Alaıda balalar shańyraqtaryn tastap, basqa jaqqa ketkisi kelmeıdi. Nazarlaryńyzǵa olardyń el  Prezıdentine jazǵan ashyq hatyn usynamyz.

- Asa qurmetti Qasym-Jomart Kemeluly! Biz Almaty qalasyndaǵy №1 balalar úıiniń tárbıelenýshilerimiz. Sizdiń halyqqa jasaǵan jaqsylyqtaryńyzdy qurmet tutamyz, ózińizdiń ıgi bastamalaryńyz ben halqymyzdyń qamy úshin jasaǵan isterińizden habardarmyz.

Biz bul balalar úıinde úsh jasymyzdan bastap tárbıelenip kele jatyrmyz. Alaıda, ystyq uıamyz qyrkúıek aıynda jabylady degen habar bar.

Aldaǵy ýaqyttaǵy bizdiń taǵdyrymyz ne bolmaq? Barlyǵymyz kishkentaı kezimizden bir shańyraq astynda tárbıelendik. Aldaǵy ýaqytta jan-jaqqa tarap, bir-birimizden ajyrap ketkimiz kelmeıdi. Burynǵy basshylar oqýǵa túskennen keıin áleýmettik ómirge daıyndaıtyn. Al biz dál qazirgi sátte óz betimizshe ómir súrip ketýge qaýqarly emespiz. Jarǵy boıynsha 18 jasqa tolǵan jetim balalardy Jastar úıine jiberedi. Sońǵy úsh jylda dırektorymyz balalardyń jaǵdaıyna qaramaı, oqýǵa túse salysymen olardy osy úıge jiberip otyr. 2018 jyly on alty jasynan Jastar úıine ketken balalar kóp qıynshylyq kórdi. Biz de áleýmettik ómirge áli daıyn emespiz.

Osy ýaqytqa deıin qanshama jerge hat jiberdik, alaıda bireýinen de jaýap kelmedi. Sonda jetim balalardyń quqyǵyn kim qorǵaıdy?

Qurmetti Prezıdent myrza! Sizden Almaty qalasyndaǵy №1 balalar úıiniń jabylmaý sharasyna atsalysýyńyzdy, ári ony óz baqylaýyńyzǵa alýyńyzdy suraımyz! Qazirgi tańda tárbıelenýshiler sany bizden de az balalar úıi jumys jasap jatyr. Úıimizdi jappańyzshy, ótinish...

  №1 balalar úıiniń tárbıelenýshileri

Pikirler
Redakııa tańdaýy