Úsh jyldan beri jabyq turǵan kesene kúmbezin jańartý jumystary aıaqtaldy. Kúmbezdiń tarıhı kelbeti saqtalyp, jeldetkish qabattary retke keltirildi. Qazir kúmbez etegindegi segiz qyrmen qosylǵan jerinde gıdrooqshaýlaý jumystary aıaqtalýǵa jaqyn ekendigin “Adyrna” Túrkistan oblysy óńirlik kommýnıkaııa qyzmetine silteme jasap habarlaıdy.
Kúmbezdi qaıta qalpyna keltirý jumystary oblys ákimi Ó.Shókeevtiń jiti qadaǵalaýymen Mádenıet jáne sport mınıstrligimen birlese júrgizilýde.
«Áziret Sultan» memlekettik tarıhı-mádenı qoryq-mýzeıi aýmaǵyndaǵy tarıhı oryndarda qaıta qalpyna keltirý jumystary, ortaǵasyrlyq Kúltóbe qalashyǵy, Han ordasy men meshiti ornalasqan magıstraldy kóshe boıynda arheologııalyq qazba jumystary qarqyndy júrip jatyr.
Al Kúltóbe qalashyǵyndaǵy qazba jumystarynyń nátıjesi boıynsha 2019 jyly 5000-nan asa bizdiń eramyzǵa deıingi 1 ǵasyrda jasalǵan ejelgi altyn buıymdar tabylǵan.
Budan bólek, Qoja Ahmet Iasaýı kesenesiniń aldynda týrıster demalatyn, qalyń baý-baqshaly selfı-aımaq jasaqtalady. Tarıhı nysannyń «Taqııa qaqpasy» mańynda qazba jumystary júrgizilip, tabylǵan jádigerler týrıster kóz qýanyshyna aınalmaq.
Sondaı-aq, B.Sattarhanov dańǵyly aýmaǵynda etnoaýyl salynýda.
Atap óteıik, Qoja Ahmet Iasaýı kesenesinde atqarylǵan jumystardyń barlyǵy IýNESKO-men kelise otyryp júrgizilýde. Kesenedegi qaıta qalpyna keltirý jumystarymen Qazaqstan Respýblıkasy Mádenıet jáne sport mınıstrligi Mádenıet jáne óner isteri departamentiniń dırektory Kúmis Seıitova da kelip tanysty.
“Adyrna” ulttyq portaly
