Bırneşe kün būryn Türkıstan oblysynyŋ hirurg-därıgerı äleumettık jelıde ota jasauǧa arnalǧan qolǧaptardyŋ sapasy tym naşar ekenın jariialaǧan edı. Qazır sol Qairat Seidualiev esımdı därıgerdıŋ jūmystan quylǧany belgılı bolyp otyr. Būl turaly "Otyrar news" habarlady.
Türkıstan oblysy, Keles audanynyŋ ortalyǧy Abaidaǧy audandyq auruhanasynda qyzmet etetın hirurg-därıger Qairat Seidualiev ota jasauǧa berılgen qolǧaptyŋ sapasyz ekenın aityp, ony kimek bolyp älektengen sätın videoǧa tüsırıp, äleumettık jelıge jüktegen.
"Qaznette" qyzu talqylanǧan būl videodan soŋ auruhana qyzmetkerı jūmystan bosatylǧan.
Därıger 8 jyl būryn "Diplommen auylǧa" baǧdarlamasymen jūmysqa kelgen. Oǧan qosa 7 jyl boiy hirurgiia bölımınıŋ meŋgeruşısı bolǧan. 33 jastaǧy därıgerdıŋ aituynşa, 2020 jyldyŋ aqpanynda jaŋa basşylyq taǧaiyndalǧaly berı ony sebepsız qudalaumen qatar, medisinalyq qūral-jabdyqtarǧa tapşylyq jiılep ketken.
Qairat Seidualiev, hirurg-därıger: «Sapasy jaǧynan öte tömen, tıptı talapqa sai emes qolǧaptardyŋ jaramsyz ekenın körsetkenım üşın auruhana basşylyǧy – bas därıgerı, bas därıgerdıŋ orynbasary, kadr bölımınıŋ basşysy, zaŋgerı, auruhananyŋ käsıpodaq töraǧasy, sondai-aq olardyŋ müşelerı – 10 şaqty adam maǧan qarsy hattama jasap, menı būiryqpen jūmystan bosatty. Būiryqty qolyma 3 minuttyŋ ışınde äkep berdı. Men auruhana basşylarynan materialdyq kömek sūraǧan joqpyn, koronavirus pandemiiasynan qorǧanu üşın sapaly qolǧap sūradym. Özım qarapaiym därıgermın, sonda aqşasy joq, tanysy joq, tuysy joq därıgerler osyndai qysymǧa ūşyrai beruı kerek pa? Ädıldık qaida? Zaŋ qaida?».Al auruhananyŋ bas därıgerı qyzmetkerınıŋ jūmystan bosatyluyna bırneşe sebep boldy dep otyr. Aituynşa, därıger jalǧan aqparat taratqan. Oǧan qosa nauqastar tarapynan tüsken aryzǧa bailanysty arnaiy komissiia ony jūmystan şyǧaruǧa mäjbür bolypty.
Aida Beksūltanova, «Abai» Keles audandyq auruhanasynyŋ bas därıgerı: «Qairat Seidualiev emhanada qolǧaptardyŋ türlı ölşemderı bolsa da emhana meŋgeruşısı men aǧa meiırbikeden sūramai, özınıŋ jeŋıl mınezımen bızge jala jauyp, äleumettık jelı arqyly taratyp jıbergen. Oǧan qosa ol 2020 jyldyŋ aqpan aiynda tärtıp saqtamaǧany üşın eskertu aldy. 2020 jyldyŋ 30 nauryzynda būl därıgerdıŋ üstınen nauqasty qaramai, 3 saǧat kölemınde kömek körsetılmegenı turaly aryz tüsken».
Komissiianyŋ mūndai şeşımımen kelıspegen hirurg endı Densaulyq saqtau basqarmasynyŋ basşylyǧy men bas därıgerdı özın jalǧan jalamen jūmystan qudy dep Prezidentke aryzdanuǧa bekınıp otyr.
"Adyrna" ūlttyq portaly
https://youtu.be/X4DTiRrDMmo
