Dana Asylbek. PEACE

1213

Kózimdi ashtym. Appaq bos bólme. Bos bólmede tek men. Biraq bul meniń bólmem emes. Qaıda ekenim túsiniksiz. Ústimde uzyn kóılek. Aq tústi kóılekti jaı keskinmen qıylǵan aq mata deýge bolady. Ony nege kıip alǵanym da túsiniksiz.

«Mama?»

Nege bulaı degenimdi bilmedim. Biraq bul sóz meni bar qaýipten qutqaratyndaı aıtylǵany ras. Dese de daýystap shaqyrǵanymdy eshkim estimedi de, jaýap bermedi de. Sebebi, aınalada aq qabyrǵa men tutqasyz jalǵyz esik qana. Óz jańǵyryǵyma ózim tańyrqap, taǵy bir ret «Mama» dedim. Jaǵalasa estilgen bas aýyrtatyn jańǵyryq. Tórtburyshty shaǵyn bólmeniń ishinde aınalyp júrip, óz-ózime suraq jaýdyryp jatyrmyn:

          «Bul qaı jer? Qane, esińe túsir! Sońǵy ret qaıda boldym?»

          «Sońǵy ret... sońǵy ret... Esimde joq...»

          «Qalaısha meniń esimde joq? Múmkin, men ólip qaldym?»

          «Múmkin emes. Otyr! Otyr da bárin esińe túsir!»

          «Men kimmin? Meniń atym kim?»

          «Meniń atym...»

Basymdy qysyp otyra qaldym. Kóz aldyma lenta qylyp estelikterimdi ákelgim kelse de, sana quryǵyr ál bermeıdi. Endi bir jaqyndap qalǵanda oıymdaǵy jarqyn beıneler tez óshedi. Túsiniksiz beıneler. Bireý esimnen aljastyryp, aq qabyrǵa artynan mysqyldap qarap turǵandaı. Syrtqy jańǵyryqty estigim kelmegeni sol, ózimmen ishten aıtystym. Óz suraǵyma ózim jaýap bere almaı qınaldym. Syrtqa daýys shyǵarsam, kózge kórinbeıtin bireý estip qoıatyn sııaqty.Úreı men qorqynyshtan alqymym qysyla bastady. Shydamaı, jaýapsyz suraqtardy jıirkenishti jańǵyryqqa malyp, aıqaılaı bastadym:

«Bul ne? Men qaıdamyn? Meni bosatyńdar! Maǵan bostandyq kerek!»

Jańǵyryqtardyń arasynan maǵan jaýap keldi. Iá, jańǵyryqtardyń arasynan bireý:

«Aýyzyńdy jap!»

Kútpegen jaýaptan shoshyp kettim. Otyrǵan ornymnan atyp turyp, esik tusqa súrine qabysyp júgirdim. Aınalada eshkim joq. Maǵan jańǵyryqtyń jaýap berýi múmkin emes. Tutqasyz esikti tyrnalaı bastadym. Tyrnaǵym saýy qalmaı syna bastady. Saýsaqtarymnan qan aǵyp ta bastady. Bireý sol saýsaqtarymdy aıap esikti ashyp jiberip, maǵan bárin túsindiretindeı. Jasymmen birge aqqan qanym toqtar emes. Qoldarym aýyrsa da, úmitim basym boldy. Tyrnasam da, ashylmaıtyn qyńyr esiktiń artynan adam daýysy estildi. Daýysyna qarap, jaqsy adamǵa balaǵym keldi:

«Jarqynym, nege sonsha qoryqtyń? Sen nege únemi osylaı ózińdi qınaısyń? Qane, anaý buryshqa bar da, tynysh otyr. Otyr da, armanda. Burynǵy ómirdi emes, jańa ómirdi, jaqsy ómirdi armanda».

Daýysy jaqsy adam bolsa da, sózderi qatigez sekildi. Álde kerisinshe. Meni aldap soqqysy keletin bireý shyǵar.

«Sen kimsiń?»

Jańǵyryqtan daýysym eki ret qaıtalanǵany bolmasa, qan josa bolǵan esiktiń ar jaǵynan eshkim maǵan jaýap bermedi. Ol meni shynymen jyndy qylyp otyr. Sol jaýapsyzdyqtan soń ornymnan súıretile turdym da, qoldaryma qaradym. Uzyn álsiz saýsaqtarymnan qyp-qyzyl qan appaq kóılegim men appaq edenge tamshylady. Aq pen qyzyldyń qorqynyshty úılesimi. Qolym dyzyldap áketip barady. Esikke jaqyndadym. Bul aýrýdan qutylý úshin kómek suramasqa amalym joq. Aýrýymnan habar berdim:

«Meniń saýsaqtarym aýyryp barady».

Jaýap joq. Esikke qulaǵymdy taqap, muqııat tyńdadym. Bireý estip qalar, ne esik artynda bireý bar shyǵar degen úmitpen tyńdadym. Bireý taban jaqyndatty. Jaqyndaǵanyna qýanyp, tolyq ótinishimdi aıttym:

«Meniń saýsaqtarym ýdaı ashyp barady. Tyrnaǵymnyń astyna esiktiń kishkentaı aǵashtary kirip ketken sııaqty. Maǵan kómek kerek».

Esikke jaqyndaǵan adam ári qaraı júrip ketti. Bunysynan meniń denemnen aqqan ár qannyń tamshysyna tıtteı de bolsa aıanyshyn baıqamadym. Ashýlandym, jaqsy ómirdi qalaı qany sorǵalaǵan saýsaqtarmen armandaıtynymdy oılap ashýlandym. Ishimnen birneshe ret oǵan tis qaıradym da, qarǵys attym: «Maqulyq!»

Buryshqa baryp, judyryǵymdy qattyraq túıip, qan aqqan saýsaqtarymdy alaqanǵa jasyrdym. Aq aǵash esiktiń ishindegikishkentaı tikenderi etime odan saıyn batty. Syzdatyp barady. Shydap baqsam da, kózimnen jas domalaı berdi. Kózimdi jumyp, álginiń aıtqanyn oryndamaq boldym. Sonda bári tynyshtalardaı. Biraq ne armandap, ne tilerimdi bilmegennen, kózim kórgen, aýzyma kelgen duǵalarymdy ishteı ózimshe aıta bastadym.

          «Jaqsy ómirdi armandaý kerek bolsa, onda men osy bólmeden shyǵatyn kezdi armandaımyn. Jaqsy ómirdi armandaý kerek bolsa, onda men tutqasy bar esikti armandaımyn».

Kózimdi jumyp uzaq otyrdym. Qansha ýaqyt jumýly otyrǵanymdy da bilmeımin. Tipti ýaqyttyń myna jerde qalaı aınalatynyn da bilmeımin. Tóbeden bir sónbeıtin, qarasa kóz aýyrtatyn jaryqtan eshteńeni aıyra almadym. Álgi jaýapsyz suraqtaryma globaldy suraqtarymdy da qostym: Qazir kúndiz be, álde tún be? Munda da Jer Kúndi aınalyp jatyr ma, álde men Kúndi aınalatyn basqa planetadamyn ba, múmkin, bul jaqta tipti aınalatyn Kún de joq?

Ne oılap ketkenimdi de bilmeımin. Bar oıym osy jerden qutylý. Qutylý úshin bar amalym - eshteńege senbeý. Eshteńege senbeý kerek bolsa da, oısha bir senimdi izdedim. Solaı óz-ózime qarsy shyǵa bastadym. Eshteńege senbeý kerek bolsa, onda ózime de senbeýim kerek. Oılaryma da. Múmkin, men munda ózim keldim. Múmkin, meniń bul jerden shyqqym kelmeıtin shyǵar. Múmkin, myna aq kóılekti kıgim kelgen ózim shyǵar. Múmkin, ómir súrý degen osy?!

***

Kózimdi ashtym. Saýsaqtarymdy bıntpen baılapty. Álde ózim baıladym ba, bilmeımin, áıteýir aýyrǵanyn qoıǵan. Biraq esik áli sol kúıinshe: tyrnalǵan qyzyl tús aralas esik. Kóılegimdegi, edendegi qan da jýylmaǵan. Qolymdy tańyp bergeni bolmasa, aq bólmeniń qanynkózińdi ashqanda óziń jý degen belgige uqsady.

Taǵyaıqaıǵa basqym kelmedi. Sebebi, jańǵyryq daýysynyń aylyǵy áli qulaǵymda. Bireýdi shaqyryp, sebep suraıtyn da halim joq. Burynda da qaıtalanǵan daǵdy sııaqty kórindi. Burynda da osylaı óz degenimdi talap etip, sodan biraz taıaq jegendeımin. Biraq neden ekenin túsinbeımin. Bularǵa ne jazdym? Jıirkenishti jańǵyryqtardy estý úshin men ne istep qoıdym?

Jańa ashqan kózimdi qaıta jumdym. Ishimde bir daýys:

«Meniń ómirim keshe ǵana aq paraqtan bastala qalǵan joq. Solaı bolsa, men dál qazirgi del-sal kúıime jaıbaraqat qaraýshy edim ǵoı. Meniń «menimdi» bireý ne bireýler joǵaltyp jibergisi keledi. Men sonymen kúresýim kerek shyǵar...»

Qaıtadan kózimdi ashtym. Áli de qutylýdy kózdedim. Esikti syndyryp ne tyrnap ashqannan, onyń tutqasyn tapqan jón sekildi kórindi. Bul bólmeden bir shıkilik izdeı bastadym. Kishkentaı ǵana bólmeni sharlap júrmin. Múmkin, maǵan kórinbeıtin detaldar bar. Biraq qaıda? Munda eshteńe de joq. Jańǵyryq she? Ol qaıdan paıda bop jatyr?Syrttan emes, ol osynnan shyǵady. Meniń sózimniń jańǵyryǵy bolsa da, ol bóten. Meniki emes. Meni ádeıi osylaı shatastyrýda. Bul bólmede meniń jalǵyz emestigim anyq.

Ornyma qaıta kelip jattym. Bireý maǵan tesile qaraǵandaı seziledi. Odan saıyn denem titirkenip ketti.

«Munda kim bar?»

Daýysymdy jańǵyryq qaıtalady da, qaıta tynyshtaldy. Basymdy kóterip jan-jaqqa qaradym. Qybyr etken eshkim kórinbedi. Onda bul jaı óz oıym shyǵar. Biraq bireý meni baqylaǵan kezde de ony bildirýi múmkin emes nárse. Ne bolsa da, men bul jerden qutylǵym keletinin bildirmeýim kerek. Kerisinshe, olardyń degenine ótirik kónýim kerek. Maǵan «buryshqa otyr da, jaqsy ómirdi armanda» dedi. Men sony oryndamaıynsha, maǵan eshqandaı belgi berilmeıtini anyq.

Buryshqa kep otyrdym. Qoldarym birdeńege tıip ketse, aýyratyny bolmasa, halim keremetteý. Mundaı jaǵdaıda sol jaqsy ómirdi armandaý esh qıyn emes sııaqty.

Áýeli bólme syrtyn elestettim. Sanam bop-bos bolǵasyn ba, basynda eshteńeni elestete almadym. Jalt-jult etip bir túsiniksiz beıne kóz aldyma kep ketkeni bolmasa, bylaıynsha aýqymdy nárse oılaı alar emespin. Sondyqtan birinshi esikti tutqasymen oıladym. Kúmis tústes jyltyr tutqanyń pishini qolǵa ustaýǵa yńǵaıly kórinedi. Jyltyrap turǵan kezinde tutqa joǵalyp keterdeı jalma-jan ustap aldym. Tutqa joǵalmady, bul jaı qorqynyshym ǵoı. Ustaýǵa óte yńǵaıly eken, tipti qoldyń izi de qalyp qoıdy. Kóılegimmen ony súrttim de, jalań qolmen qaıtadan ustadym. Bul joly qolymnyń usqynsyz izderi qalsa da, maǵan báribir kórindi. Tutqany tómen qaraı bastym da, aqyryn esikti ashtym. Esik tyq etti de, ózi ashyldy. Ári qaraı ne oılasam bolady eken?! Bólme syrtynda... bólmeniń syrtynda... Eshteńe!

Kózimdi ashtym. Eshteńe! Eshteńeni ári qaraı elestete almaımyn. Ári qaraı eshteńeni armandaı almaımyn. Syrttaǵy nárseni men ózimdi qınasam da, oılaı almaımyn. Sanamdy shynymen tazartyp tastaǵandaı. Bul ómirde neniń bary men joǵyn bilsem de, men olar jaıly oılaı almaıtyn bir meńireýge aınalǵan sııaqtymyn. Men Kúnniń baryn bilsem de, onyń qandaı ekenin umytqanmyn. Shóptiń jasyl, aspannyń kók ekenin bilsem de, olardyń kózime qalaı kórinetinin bilmeımin. Meni sonsha músápir etken olar ne armandaǵanymdy qalaıdy sonda?!

 

***

 

Shýlaǵan adamdar daýysy. Birdeńeni urandaıdy. Sol esh túsiniksiz estilgen urannan teris buryldym. Adamdar daýysy áli qulaqta. Tolqyndy uranǵa teńiz tolqynynyń daýysy aralasty. Tolqynyn jaǵaǵa tez soǵyp, ózine qaıta tartyp alatyn teńiz beınesin kórip turmyn. Bul men ósken óńir bolsa kerek. Alys jaǵadan bir áıel kórindi. Jalańash deneli áıel. Sulbasy qum saǵatty eske salatyn áıel menen alystap barady. Bul... bul men ǵoı. Men ózimdi kórip turmyn. Jelden shashtarym kóz aldymdy kólegeılep áıel sulbasyn menen jasyra bastady. Biraq men ózimdi anyq tanydym. Sol tolqyn úninearalasyp óte baıypty áıel daýysy estildi:

«Iren Azamat. 31 jastaǵy áıel. Memlekettik qupııany ashyp, shpıondyq etken áreketteri úshin halyqaralyq qaýipsizdik komıtetiniń sheshimimen asa qaýipti qylmysker sanaldy. Qazir ózin túzetý ızolıatoryna qamaldy».

Oǵan bireý raııadan, ne telefonnan baılanysqa shyqty. Daýysy áıelge qaraǵanda bulyńǵyr estildi:

«Qabyldandy. Sanasynda ózgerister bar ma?»

Mańdaıyma bireýdiń qoly tıdi. Sol áıel sııaqty:

«Qazirgi zertteýlerge sáıkes, sanasy tolyq tazalandy. Jumys jasaýǵa ázir».

Kóz aldymnan teńizdiń beıneleri joǵaldy. Tıisinshe, bir bólmede otyrmyn. Kórip otyrǵandarym, odan anyq bola tústi. Bólmede qońyr tústi zattar kóp. Dala jaryǵyn japqyshpen qymtap, kúnniń kózin jasyrǵan. Kúńirengen bólmede birneshe adamdar otyr. Bitpeıtin pikirtalas arasynan paıda bolǵandaımyn. Bári bir aýqymdy problemany kóterip, bir-birine sóz bermeı jatyr. Oń jaqtaǵy er adam maǵan qarap otyryp, aıanyshty sóıledi.

«Biz oılaǵan jospar tap saǵan qıyndyq ákeletinine kepildik bere alamyn. Sondyqtan dál qazir bárimizge doǵarǵan jón. Áıtpese, biz armandaǵan azattyqtyń qunyna seni tynyshtyqtan aıyrady».

Barlyǵy onyń osy sózine kelise bastady. Esime endi túse bastaǵandaı. Bul oılar ómirde bolǵan sııaqty. Kenet arqa tustan bireý aıqaıǵa basty. Kúńgirt qońyr atmosfera lezde sur bólmege aınaldy. Kekil shashtarym júzimdi jasyryp tur. Qatty terlep qalyppyn, óte ystyqtap baramyn. Bireý kekilimnen nyǵyzdap ustady da, basymdy joǵary qaratyp:

«Múmkin, óz basyńdy, otbasyńdy oılarsyń? Negizi mamań sondaı sulý áıel».

Basymdy birden ústelge soqty. Bárinen onyń sońǵy aıtqany eń úlken qaýipti sóz bop  estildi. Óz basym qaýipte turǵanyn bilsem de, sondaı sulý áıeldiń taǵdyryna alańdaı bastadym. Mamamnyń beınesi oıǵa keler emes.Biraq shynynda, ol sondaı sulý áıel bolatyn. Bala kezdegi teńiz jaǵasyndaǵy kúnder men sátter áli esimde. Birde teńizge barar joldamamam maǵan ártúrli nárseni aıtyp, túsindirýmen boldy. Ol kezde segiz ne toǵyz jastamyn. Kúıeýden jaqynda ajyrasqan mamam tereń qulazymaýǵa ábden tyrysty. Tastap ketýden soń ol ózin «erkek qoqysy» sııaqty sezinbeýge baryn saldy. Teńizge jol tartqan kólikti júrgizip kele jatqan otyz jasar áıel maǵan óziniń endi «erkin áıel» ekenin birneshe ret aıtqan. Jyldar boıy onyń osy sózderi sanamda ózin jubatý sózderi bop qaldy.

Bári eske tústi. Erkin áıeldiń qolynda ósken men de erkindikke umtylǵysh boldym. Erkindigimdi alǵash qatigez sur tergeý bólmesi buzsa,sońǵy bop aq bólme qurtty.Sasyq keńistikter. Bári esime endi kele bere shıqyldaǵan kompıýterlik jaǵymsyz daýys estildi.

Kózimdi ashtym. Álgi baıypty daýysty áıel janymda.Aldyndaǵy monıtorǵa badyraıǵan áıel kompıýterden óz sanamdy ózim basqara bastaǵanym belgi bop kelgenin kórdi. Jaǵymsyz daýys sonyń belgisi.Ol jańa sıpattaǵan áıel meniń naq ózim. Bul men - Iren Azamat. Aq halatty áıel atyp tura qolyna telefon tutqasyn alyp jan ushyra aıqaılady:

«Qylmysker emdeý proedýrasynda oıanyp ketti. Ir...»

Qolyma túsken qatty zatty aldym da, názik tándi áıeldiń basynan qoıyp qaldym. Ol sonsha shoshyp, «qylmysker» dep ataǵanyna ózimdi qurban sezinip em, basynan urǵanym ol oıdy basyp saldy. Monıtorǵa jalǵanyp basyma qadalǵan uzyn toktardy ajyrattym. Munda uzaq jatqan sııaqtymyn, basym aınalyp, óz-ózime kele almaı, azdaǵan sekýndqa toqtap qaldym. Óz-ózime bir qaradym. Aq uzyn kóılekti sur tústi kóılekke almastyrypty. Buǵan ne sebep ekenin bilmedim, biraq bul jaı keskindelgen mata emes, kádimgi ýnıformaǵa uqsaıdy. Basqasy basqa, dál qazirgi bar oıym: bul jerden qutylý.

Áıel dárigerdiń kabınetiniń syrtyndaǵy jaǵdaıdyń qandaı ekenin de bilmeımin. Esik aldynda qalyń kúzet tursa da, tipti ǵımarat syrtynda tursa da, bildirmeı ketý óte qıyn. Bul jer maǵan jat.

«Dál qazir jatyrqap turatyn kez emes, pyshaqty al da, júr. Meni qorǵaıtyn munda basqa qural joq».

Áıeldiń kıimin sheshýden basqa amal joq. Ony jalańash qaldyryp, kıimin tartyp alýym, árıne, durys emes. Biraq men bostandyqqa shyǵýym qajet.

Esik syrty men oılaǵannan da qaýipsiz boldy. Uzyn dálizden aýrýhana ekeni baıqaldy. Baspaldaq tustaǵy ǵımarattyń tótenshe jaǵdaıǵa arnalǵan kartasyn qaradym. Shyǵar tus pen jertóledegi esiktiń qıylysatynyn kórip, baspaldaqqa umtyldym. Baspaldaqtan tómen quldılap kelemin. Asyǵýdamyn. Óte asyǵyspyn. Syrtqy ómirde meni ne kútip turǵanyn bilmeımin. Mamam tiri me? Elde ne bop jatyr? Meniń bostandyǵym basqalardyń bostandyǵyna kepildik bolatynyna degen úlken senim boıyma jaıylyp ketti. Bul oılardyń arasynda baspaldaqtan qalaı sonsha tez túskenimdi baıqamadym da. Basym aınalyp, entigip bir demimdi tereń aldym da, esikti ashtym.

Qarańǵy uzyn dálizge tústim. Alystan syrttan jaryq túsedi. Bul qarańǵy dálizde eshkim joǵyna senimdi túrde, entigimdi basyp, jaı júrispen kele jatyrmyn. Sý shalshyqtarynan jalańaıaq meniń kele jatyrǵan adymym ǵana estiledi. Jaryqqa jaqyndaǵan ár qadamym beıbitshilikke qaraı jasalǵan ár qadam ispettes. Aıaǵymdy alshaq basyp, ishteı maqtanysh sezimi oıandy.

«Men kelemin senderge! Alystaǵy anaý esikten asqan soń barlyq ozbyrlyq meniń tabanymnyń astynda bolady!»

Shalshyq únine jańa adym qosyldy. Tý syrtymnan shyqqan daýysqa dereý buryldym.

«O, Táńirim! Endi jetpegeni taǵy bir shaıqas edi. Men sharshadym...»

Qarap tursam, qara kıimdi bireý. Júzi kórinbeıdi. Kúzettegilerdiń bireýi bolýy kerek. Alǵashqy sózinen-aq qarsy sóıledi.

«Qashyp qutylýyń sátti shyǵatynyna kúmánim mol. Neshinshi ret osy qadamǵa baryp tursyń bilesiń be?»

Sózderin elemegendeı, bul suraqty qoıǵym kelmese de, jaýaby mańyzsyz bolsa da, suradym:

«Sen kimsiń?»

«Sen kimsiń?(keleke qyp qaıtalady) Keshe ǵana óz jańǵyryǵymen alysyp otyrǵan aqymaq. Baıaǵy sasyq ómirine oralyp, mıllıon adamnyń mıyna bolmaıtyn bir pátýasyn úıretpek. Seniń bos sózińdi tyńdaıtyn endi eshkim joq. Álem sensiz-aq soǵys órtine ádemi oranyp keledi. Seni sonyń shoǵyna tastaý kerek. Beıbit ómirdi tileıtinder soǵystyń otyna órtenýge laıyq».

Sóılep turyp, sýdy aýyr etigimen sıpap ótip jaı qadamdaryn bastady. Aramyz on metrdeı jer edi, ol jaqyndaı tústi. Bul qadamdar qazir meni lezde jalmaıtyn jalmaýyzdyń aram qadamy. Budan qutylý joly tek – qashý. Tura birden artqa burylyp, jaryqqa qaraı júgirdim.

«Quldyq sanadan qash. Men kútken jarqyn ómir jaqyn qaldy. Qash, Iren Azamat, qash! Erkindikti qalaıtyn azat rýhyń tánińe qanat bitirsin de,alysqa ush!»

Óz-ózimdi jigerlendirip, tabanym jerge tımeı qashtym. Shalshyq baltyrymdy malmańdaı sý qylsa da, aıaǵym jalańaıaq bolsa da, quryp ketkir jertóleniń dálizi sheksizdik sekildi uaıaqtalmaı jatsa da, ókpem qysylsa da, toqtamadym. Sol sulý erkin áıel mamamdy jáne meniń mamam sekildi erkindikti súıetin jandardy kórýge asyqqannan toqtamadym. Jaryq jaqyndaǵan saıyn eń keremetti ǵana oıladym.

Dálizdiń arǵy jaq shetinen birdeńe tars etti. Denemdi basqara almaı, tizerleı qaldym.Kózim qaraýyltyp, arqamnan aýyrlyqty sezdim. Jańa ǵana jaryqtyń jyldamdyǵymen usha jónelgen Iren Azamat... Esikke bes-aq qadam qalǵan sát. Tur! Júgir! Kózińdi ash! Bostand...

 

***

 

Kózimdi ashtym. Ádettegi qara tústi ýnıformany kıip, baqylaý kabınetine erte keldim. Jyn soqqandaı basyn qabyrǵaǵa soqqan qylmysker, bir sózin qaıtalaı berdi:

«Kógershin! Kógershin! Kógershin!»

Qaıtalaı bergen soń, ashýlanyp qolyma daýys ulǵaıtqyshty alyp:

«Aýyzyńdy jap!»

Qylmysker qulaǵyn jaýyp otyra qaldy. Jalma-jań esikke júgirdi de aıqaıǵa basty:

«Meni bosatyńdar! Maǵan bostandyq kerek!»

Qylmysker ızolıaııa bólmesiniń tutqasyz esigine jarmasyp, tyrnalaı bastady. Sol baıaǵy báriniń qaıtalaıtyn esh qaýqarsyz sózderi. Ony aıap, satqyndyǵyn keshiretindeı, esikti tyrnalaı bastady. Qarap turyp shydaı almadym:

«Qandaı jıirkenishti adam! Qandaı jıirkenishti sóz! Sasyq ertegige senetin aqymaq qorqaýlardyń kótergen jalaýlary men urandary – Beıbitshilik! Ómir soǵystan turǵan jáne ony jasaýshylar dashyn ómirge beıimdelgen naǵyz adamdar. Aq kógershinderdiń duǵasy tek bostandyq tileý.Olar shyn kúreske jaralmaǵasyn jan men tániniń shyn qyzyl qanǵa toly kúresinen alys bolǵanyn tileıdi. Maqulyq!»

Aqtóbe qalasy.

Pikirler
Redakııa tańdaýy