Bıýdjet kirisiniń úshten biri ulttyq qor esebinen alynyp otyr - Nyǵmatýlın

561

Májilis tóraǵasy Nurlan Nyǵmatýlın  memlekettik bıýdjettiń kiris bóliginiń úshten biri, al shyǵys bóliginiń tórtten biri ulttyq qordyń esebinen qalyptasyp otyrǵanyn, ulttyq qordyń aqshasy ońdy-soldy jumsalyp jatqanyn synǵa aldy. Bul týraly Sputnik     habarlady.

Májilis depýtaty Jámıla Nurmambetovanyń aıtýynsha, bilim jáne ǵylym mınıstrligine otyz ýnıversıtette kovorkıng ortalyǵyn ashýǵa 663 mıllıon teńge bólingen. Qarajat ulttyq qordyń maqsatty transfertterinen baǵyttalǵan. Alaıda aqsha júz paıyz ıgerilmegen.

"Iaǵnı, eldiń joǵary oqý oryndarynda josparlanǵan birde bir kovorkıng aımaq ashylǵan joq. Eger ýnıversıtetter kovorkıng ortalyqtaryn ózderi ashýǵa múmkindigi bolsa, ulttyq qordan aqsha bólýge qandaı qajettilik týdy?", dep surady ol bilim jáne ǵylym mınıstrinen.

Ashat Aımaǵambetov kovorkıng ortalyqtaryn bıýdjetten aqsha shyǵarmaı ashý múmkindigi bolǵandyqtan, 663 mıllıon teńge bıýdjetke keri qaıtarylǵanyn aıtty.

"Bul kovorkıng ortalyqtar ashylady. Maqsatqa qol jetkizemiz. Qazirdiń ózinde bes ortalyq ashyldy. Qalǵan jıyrma besi kelesi jyldyń basynda ashylady", – dedi mınıstr.

Biraq, májilis tóraǵasy Nurlan Nyǵmatýlın Aımaǵambetovtiń jaýabyna qanaǵattanbady.

Aıtýynsha, mınıstr depýtattyń saýalyn durys túsinbegen. Májilismen kovorkıng ortalyqtardyń ashylýy týraly emes, nege olarǵa ulttyq qordan aqsha bólingenin surady.

"Siz, qatelespesem, byltyr jazda mınıstr boldyńyz. Sondyqtan osy kovorkıng ortalyqtarǵa bólingen mıllıon dollarlar týraly bilmeıtin de shyǵarsyz. Kovorkıng ortalyq degen ne, aldymen, sonyń basyn ashyp alý kerek edi. Ol jaı ǵana suqbattasý, áńgimelesý alańy, atalǵan jaǵdaıda jumys berýshiler men stýdentterdiń qarym-qatynas alańy. Qazir bárin sheteldiń ádemi sózderine aýystyryp, kóp aqsha alady da, ony keıin ıgermeıdi. Aıtyńyzshy, bul ulttyq qordan aqsha alatyndaı sonshalyqty úlken problema ma edi?. Men olaı dep oılamaımyn", – dedi Nyǵmatýlın.

Májilis tóraǵasy kovorkıng ortalyqtardy ashýǵa ulttyq qordan qarjy bólýge qandaı qajettilik týǵanyn ulttyq ekonomıka mınıstri Rýslan Dálenovten surady.

Mınıstr Nyǵmatýlınniń "ulttyq qordyń aqshasyn shashýǵa bolmaıdy" degenimen keliskennen basqa mardymdy eshteńe aıta almady.

"Ulttyq qordyń qarjysyn shashýǵa bolmaıdy. Ol týraly Elbasy da, prezıdent te únemi aıtyp júr. Sondyqtan ulttyq qordyń ár tıyny qatań baqylaýda bolýy qajet. Ol aqshany tek erekshe jaǵdaıda ǵana alýǵa bolady", – dep eskertti spıker.

Májilis tóraǵasynyń aıtýynsha, úkimetke bir baǵdarlamadan artylǵan aqshany ekinshi baǵdarlamaǵa aýdarýǵa zańnamalyq túrde múmkindik berilgen.

"Eger mınıstrlik ishinde bir baǵdarlamanyń aqshasy ıgerilmese, sony kovorkıng ortalyqtarǵa bólý kerek edi. Mundaı quzyret bar ǵoı sizderde. Parlamentke kelmeı-aq, úkimettiń qaýlysymen mınıstrlik ishinde bóle berýge bolady. Kovorkıng ortalyqtarǵa aqsha suraǵanda, qarjy mınıstrligi, ulttyq ekonomıka mınıstri qaıda qarady? Qandaı jaýapsyzdyq! Álıhan Ashanuly (premer mınıstrdiń birinshi orynbasary) mundaı áreketterdi toqtatý kerek", – dedi Nyǵmatýlın.

Onyń aıtýynsha, qazir memlekettik bıýdjettiń kiris bóliginiń úshten biri, al shyǵys bóliginiń tórtten biri ulttyq qordyń esebinen qalyptasyp otyr.

"Bul ne, erekshe jaǵdaı ma? Bizdiń mınıstrler aqshanyń qaıda jatqanyn bilmeıdi. Bulaı isteýge bolmaıdy, áriptester. Bar qarajatty ıgermeısizder, baryp ulttyq qordan taǵy alasyzdar. Qordyń aqshasyn ońdy-soldy shashýǵa bolmaıdy. Álıhan, Ashanuly, kelisip alaıyq. Tártip ornatyńyzdar", – dedi ol.

Sputnik.kz

 

Pikirler
Redakııa tańdaýy