Prezıdent Qasym-Jomart Toqaevtyń saıası qýǵyn-súrgin qurbandaryn eske alý kúnine oraı jasaǵan Úndeýin tyńdap, qatty tolqydym. Totalıtarlyq rejım uıymdastyrǵan qýǵyn-súrginniń eń aýyr saldarynyń biri - deportaııa bolatyn. Jaýyz saıası júıe KSRO aýmaǵyndaǵy az halyqtarǵa óte kúshti qysym kórsetti. Bizdiń ata-babalarymyz týǵan jerinen kúshtep qonys aýdarylyp, Qazaqstanǵa jer aýdarylǵan. Sol qıyn-qystaý kezeńde qazaq halqy deportaııalanǵan ult ókilderine kóp qamqorlyq jasapty.
Qazaqtyń jaqsylyǵyn kórgenderdiń biri – meniń ájem bolypty. Týǵan jerinen ajyrap, erkinen tys jer aýdarylǵan baıǵus ájem kishkentaı 6 balasymen birge qystyń qaqaǵan aıazynda vagonnan túsip, dalada qalǵan. Aıazdan úsýge aınalǵan balalaryna qaraýǵa dáti barmaı, úmiti úzilýge shaq qalǵanda bir qaıyrymdy qazaq azamaty jolyǵypty. Ol búrseń qaqqan balalardy kórisimen ústindegi tulybyn sheship, olardyń ústine jaýypty. Sodan ájem qazaqtardyń meıirimine talaı bólengenin erekshe yqylaspen áńgimelep beretin edi.
Ájem ústindegi tulybyn sheship berip, balalaryn úsik shalýdan aman alyp qalǵan Amanjol esimdi kisi týraly jıi aıtyp beretin edi. Soǵystan keıingi qıyn jyldary ózderi de jarymaı otyrǵanyna qaramaı qazaqtar ájemdi 6 balasymen úıine kirgizip alyp, bir úzim nanyn bólip bergen eken. Sodan ájemiz óz balalary men nemerelerine qazaqtarǵa qashan da qurmetpen qaraýdy ósıet etip aıtýmen ótti.
Iá, sol dáýirdegi aýyrtpalyqtar búkil Qazaqstan halqynyń basyna túsken náýbet edi. Halqymyz endi ondaı zulmatqa ushyramaýy úshin óz tarıhymyzdy zerttep, ony jadymyzda jańǵyrtyp otyrýymyz óte oryndy. Prezıdent Úndeýiniń máni, mine, osynda.
Sajdat AHMETOVA,
Shymkent qalalyq sheshen-ıngýsh etnomádenı birlestiginiń tóraıymy
