Dúnıejúzilik densaýlyq saqtaý uıymy (DDSU) álemde bir kúnde 106 myńnan astam adamnan koronavırýs tabylǵanyn habarlady. Bul - buryn-sońdy bolmaǵan eń joǵary kórsetkish.
Álemde vırýs juqtyrǵandar 5 mıllıon adamǵa jýyqtady. 325 myńnan astam adam koronavırýstan qaıtys bolǵan.
Eýropa elderi indettiń beti qaıtqanyn habarlap, shekteý sharalaryn birtindep jumsartsa, damýshy elderde vırýs órshigen.
DDSU-nyń málimeti boıynsha, Latyn Amerıka elderi, Úndistan jáne ózge aımaqtarda ınfekııa jyldam tarap, testter jıi júrgizile bastaǵan.
"Pandemııa áli uzaqqa sozylady. Biz tabysy ortasha jáne tómen elderde koronavırýs juqtyrǵandardyń artýyna alańdap otyrmyz" dedi Dúnıejúzilik densaýlyq saqtaý uıymynyń jetekshisi Tedros Gebreıesýs.
Brazılııada koronavırýstan qaıtys bolǵandar sany artyp, 18 myńnan asqan. Latyn Amerıkadaǵy eń iri el álemde koronavırýs juqtyrǵandar sany (275 myń adam) boıynsha úshinshi orynǵa shyqty. Úndistanda bir kúnde 100 myńnan astam test júrgizilip, bir kúnde 5 611 adamnan koronavırýs tabyldy.
