Bul kómek aldymen, kópbalaly otbasylarǵa, múmkindigi shekteýli jandarǵa, múgedek bala tárbıelep otyrǵan ata-analarǵa, resmı tirkelgen jumyssyzdarǵa kórsetildi. Solaı bolýy zańdy da. Sebebi, kópbalaly otbasy – bereke-birliktiń úılesken jeri, demek, elimizdiń darhan bolashaǵynyń kepili. Al, múmkindigi shekteýli jandardyń múddesi únemi memlekettiń tikeleı nazarynda. Turmystyń qıyn jaǵdaıyna tap bolǵan azamattarǵa beriletin kómektiń túri – azyq-túlik sebeti. Tótenshe jaǵdaı jarııalanǵaly bul kómek 500 myńǵa tarta adamǵa beriletin bolǵan. Prezıdent Qasym-Jomart Toqaevtyń tapsyrmasymen tizim keńeıtilip, qosymsha qarjy qarastyryldy. Eńbek jáne halyqty áleýmettik qorǵaý mınıstri Birjan Nurymbetov el boıynsha 1 mln. 243 myń adam osyndaı kómek alǵanyn aıtty. Olar azyq-túlik sebeti bolmasa 4 aılyq eseptik kórsetkish kóleminde qarjy alýda. Úkimettiń jasaǵan taǵy bir jeńildigi – eshqandaı mekemege kelip, ótinish jazýdyń qajeti joqtyǵy. Kómek alýy tıis azamattardyń tizimin jergilikti atqarýshy organ ózi qalyptastyryp, tıisti járdemdi taǵaıyndady. Tótenshe jaǵdaıǵa baılanysty azamattardyń birqatar sanatyna azyq-túlik turmystyq jınaq aqsha túrinde shottaryna aýdarylýda. Tek, jeke shottyń nómiri bolsa boldy, osy shotqa aqsha túsip turady. Bólinetin qarjy kólemi de az emes. Tótenshe jaǵdaıǵa baılanysty azamattardyń birqatar sanatyna azyq-túlik turmystyq jınaq aqsha túrinde shottaryna aýdarylýda. Otbasynyń ár múshesine bólinetin qarjy mólsheri – 5567 teńge. Shottaryna qarjylaı áleýmettik kómek túsken kópbalaly otbasylardyń memleketke degen rızashylyǵy sheksiz. Qarqaraly aýdany, Qaraǵaıly kentiniń turǵyny, alty bala tárbıelep otyrǵan Meıramgúl Shákirova elimizde tótenshe jaǵdaı engizilgeli memlekettiń qamqorlyǵyn erekshe sezingenin aıtady. «Úkimettiń bizdi, kópbalaly otbasylardy umytpaı, kómek jasap jatqanynyń arqasynda men ózge de turmystyq zattarǵa alańdamastan, balalarymnyń tárbıesimen aınalysa alamyn. Qazir olardyń sabaqtaryn qadaǵalap, alańsyz bilim alýyna, elin súıer eljandy azamat bolyp ósýine erekshe kóńil bólýdemin. Álbette, osynyń barlyǵy memleketimizdiń bizge, kópbalaly analarǵa jasaǵan qamqorlyǵynyń arqasy. Otbasynyń ǵana emes, memlekettiń de negizgi dińgegi – anany syılaǵan, anany qurmettegen eldiń mereıi árqashan ústem bolary anyq», – deıdi ol. Oblysymyzda naýryz aıynyń ózinde ǵana kepildendirilgen ataýly áleýmettik kómek alatyn otbasylardaǵy 6316 balaǵa aqshalaı tólem túrinde azyq-túlik-turmystyq jınaq tólendi. Oǵan bólingen qarjy kólemi – 35,1 mln. teńge. Al, sáýirdiń sońyna deıin 427 mln. teńgege 76 myńnan astam adamdy azyq-túlik, turmystyq jıyntyqpen qamtamasyz etý josparlanǵan. Qazirdiń ózinde bul kómekti 18 myńnan astam turǵyn alyp otyr. Solardyń biri – Prıozersk qalasynyń turǵyny Móldir Qutjanova. Joldasy ekinshi toptaǵy múgedek bolǵandyqtan, indet elge kelgeli balalar úshin alańdaýshylyq tanytqanyn, biraq, memleket tarapynan jasalǵan kómek, ol kúdigin seıiltkenin aıtady. Tótenshe jaǵdaı kezinde berilgen azyq-túlikti jáne turmysqa qajetti zattardy 4 qyzy men 1 ulynyń qajetine jaratqan Móldir aı saıynǵy qoldaý sharalary qıyn kezeńde otbasy birligin odan saıyn bekemdeı túskenin aıtady.
