Shymekent qalasynyń «Shymkent city» qalashyǵyndaǵy 16 qabatty turǵyn úıler maýsym aıynda el ıgiligine beriledi.
Bıyl tamyz aıynda «Shymkent City» qalashyǵynda 1048 páterli 16 kredıttik turǵyn úı men 2 ınjenerlik ınfraqurylym nysany paıdalanýǵa berilmek. Sonymen qatar, aǵymdaǵy jyly qalashyqta 4,3 mlrd teńgege jalpy uzyndyǵy 13,8 shaqyrymdy quraıtyn 7 kósheniń qurylysy aıaqtalmaq.
Taıaýda Shymkent qalasynyń ákimi M. Áıtenov jańa qalashyqtaǵy salynyp jatqan turǵyn úılerdi aralap kórgen bolatyn. Shahar basshysy óz sózinde qajetti qurylys materıaldaryn tasymaldaýshy kólikterge qalada júrip turýyna eshqandaı kedergi bolmaý kerektigin atap ótken edi.
Qazirgi kezde «Shymkent City»-de franýz sáýlet stılinde 16 qabatty turǵyn úıler boı kóterýde. Turǵyn úı kesheni aýmaǵynda zamanaýı sport alańdary, avtoturaq bar. Qala ákiminiń tapsyrmasyna sáıkes, ol turǵyn úılerdiń 4-ýi maýsym aıynda, ıaǵnı Qala kúnine oraı tapsyrylmaq.
Atalǵan turǵyn úılerdiń qurylysyn «Otaý Stroı» kompanııasy júrgizýde. Bas ınjener Abjat Akımovtyń aıtýynsha, qalashyqta 360 páterli turǵyn úıdiń negizgi bólikteri aıaqtalǵan. Qazir ishki jóndeý jáne qasbetterin qaptaý jumystary júrip jatyr.
Sonymen qatar, qalashyqta 1200 oryndyq jańa mekteptiń qurylysy aıaqtalǵan. Endi sol mańnan balabaqsha salynady. Oǵan qajetti ınjenerlik-ınfraqurylym tartylǵan. Óz aldyna modýldi jylytý qazandyǵy bar. Ol mekemeler men turǵyn úılerdi jyl on eki aı ystyq sýmen qamtıdy.
Eske sala ketsek, «Shymkent City» shaǵynaýdanynyń jalpy aýdany - 427 ga, 12 oramǵa bólingen. Sonyń ishinde, memleket qarjysy esebinen 24,5 ga quraıtyn 1-shi oramda jalpy quny 27 mlrd teńgege 43 nysannyń qurylysy josparlanǵan. Onyń 39-y - kópqabatty turǵyn úı. Búgingi tańda qalashyqta 25 nysan paıdalanýǵa berilgen, 23 kópqabatty turǵyn úıdegi 1290 páter el ıgiliginde.
Shymkent
