Arman Serikuly. Qazirshe maǵan sol ǵana medet

471

Amanhan Álimuly  aǵa, sizdi ortamyzdan ketti degenge sene alar emespin. Myna qara indettiń kesirinen bir ýys topyraq sala almaı, qoshtasýǵa bara almaı kókiregimiz qars aırylyp, qusaly kúı keshken jaıymyz bar. Keshirshi bizdi aǵataı...

Rýhyńyz myqty, júregińiz dátti edi ǵoı. Balasha alyp-ushyp turar minezińiz sizdiń áppaq júregińizden, perishtedeı kóńilińizden habar beretin... Sizdi ólmesteı, bul jalǵannan ketpesteı kórýshi edik.

Ras, keıingi kezderi kóńilińizdiń túbinde áldebir muń, sher bary sezilýshi edi. Jıi kúrsinetindeısiz.
Byltyr Beıbit Nálibaev (Beybit Nalibaev) balańyzdyń muryndyq bolýymen Adyrna Birlestigi uıymdastyryp, Almatydaǵy Muqaǵalı atyndaǵy mektepte sizben keremetteı kezdesý ótip edi. Balasha qýanyp edińiz sonda. Sońynda sizdi kólikpen jetkizip tastaǵanda da janyńyzda áldeqandaı jaısyzdyq baryn ańǵartyp qalǵandaı boldyńyz. Aqyn jany tym názik qoı, mansap pen baılyq qýyp, aq pen qarany shatastyryp alǵan, kózderi shel basqan qoǵamda jan syryńyzdy kimge aıtaryn bilmeı ah urdyńyz ba eken? Ózegińizdi qaryǵan óksikti ot jalyndaı kúıik boıyńyzdy tutas sharpyp, janyńyzdy da jaılap bolǵan eken-aý😢.
Sizben tanystyǵym Qazybek Isa aǵanyń "Jas qazaq úni" gazetinde jumys istegen stýdenttik shaǵymda bastalyp edi. Suhbatqa barardan buryn aqyn-jazýshylardyń eńbekterimen tanysýymyz qajet. Siz Aı sózin, Aıǵa qatysty uǵymdar men tirkesterdi jıi qoldanýshy edińiz ǵoı. "Aı nury alaqanymda" atty kitabyńyzda Aı sózi 117 ret kezdesetini týraly bir suraǵym sizdiń kóńilińizdi kókke kóterip edi. Sol bir kezden bastap Amanhan aǵa, siz ekeýmizdiń aramyzda sondaı bir rýhanı baılanys ornap edi. Ol kezde "Zań" gazetinde qyzmet etesiz. Ara-tura shahmat oınap turatynbyz.

Meni "Zań" gazetindegi jańa basshylyqqa tanystyryp, jaýapty hatshy, tipti bas redaktordyń orynbasary etip qoımaq bolǵan aq nıetińizdiń ózi nege turady? Ondaǵylar sizdiń usynyspen kelisip meni ataýly qyzmetke shaqyrǵanda qıqarlyǵyma basyp "qalyptasqan oqyrmandarymdy qımaı" burynǵy jumysta qalyp qoıǵanym keıin ókinishke ulasaryn kim bilgen... Ol kezde aýyzdyqpen alysqan asaýdaı edim ǵoı. Keıin jalaqysy qaryn toıdyrmasa da, oqyrmandar lebizi kóńil toıdyryp júrgen basylym basshylyǵynan ádiletsizdik kórip, qýǵyndala bastaǵanymda, basqa-basqa emes, dál sizdiń taǵy da arasha túsip Bas dırektorǵa habarlasqanyńyz - úlken azamattyǵyńyz eken ǵoı. Qý tirshilikpen júrip sol jaqsylyqtaryńyzdy da umytyp ketkenim be, aǵataı😢. Odan beri qanshama jyldar ótti, jylǵalardan qanshama sý aqty. Al siz sol baıaǵysha ózińiz úshin emes, ózgeler úshin kúresken, ańqyldaǵan aq peıilińizden bir de aınyp kórgen joqsyz. Biraq sony túsinip, sizdi qadirlep aıalalaı almadyq. Ózekke ókinish kepteledi. Arpalys, alys-julys, qym-qýyt tirshilikte qarapaıym ǵana aqynnyń jan álemine úńilgen kim bar?

Jastarǵa qamqor, bir adamdy bolsa da kóńilin kóterýge tyrysatyn daladaı keń júrekti sizdeı aǵataıymdy qaıdan ǵana tabarmyz?😢.

Júrektegi tebirenisti, kóz jasymdy, bir kúnniń ishinde kóńilimde ornaǵan sizge degen saǵynyshymdy rýhyńyz sezetin shyǵarsyz. Qazirshe maǵan sol ǵana medet...

Pikirler
Redakııa tańdaýy