Túrkiler qonaqta

2525
Adyrna.kz Telegram

ál-Farabı atyndaǵy QazUÝ-dyń Shyǵystaný fakýltetine qarasty TúrkSOI kafedrasy, Nıderlandy professory, túrki eskertkishteri jáne túrki tarıhı fonologııasynyń mamany Bilge Ózelmen, Altaı Respýblıkasynan arnaıy shaqyrylǵan Yrystý Mecheshev, Altyn-Aı Baratova esimdi ónerpazdarmen kezdesý uıymdastyrdy.

Jaqynda ǵana kafedra tizginin ustaǵan f.ǵ.d. Erden Qajybek «bul sharany uıymdastyrýdaǵy maqsatymyz – «túrkilik tarıhymyz ben mádenıetimizdi zerdelep, tanyp, Altaı eliniń ónerpazdarymen rýhanı baılanysty  jandandyrý, túrki dúnıesiniń mádenıetin qazaq jurtyna nasıhattaý»­ – deı kele, qonaqtardy qysqasha tanystyrdy. Odan ári sóz alǵan túbi túrki golland azamaty Bilge Ózel ózi sýretke túsirgen tańbaly tastar men bitik tastar boıynsha slaıd-shoý úlgisinde  baıandama jasady. Bilge rasynda bilgir eken. Kóptegen jyldar boıy Altaı Respýblıkasynda zertteý jumystaryn júrgizgen ol, myńdaǵan jádiger men rýhanı muralarymyzdy taýyp, ony jurtshylyqqa jarııalap keledi. Kóne Túrik tarıhyna qatysty tańbaly tastar men jazýlardy orys pen batys ǵalymdarynyń emes, túrkilik zertteý turǵysynan qaraýdy jón sanaıdy. Ol tastaǵy sýretterge jan-jaqty sıpattama berdi.

 Yrystý men Altyn-Aı  topshýr dep atalatyn ulttyq aspabynyń súıemeldeýimen «Qojań», «Qulyn»,  «Kúler han», «Ból-ból», «Maadaı Qara»,  «Jylqy»  sekildi shyǵarmalardy oryndady. Batyrlar jyry úlgisindegi áýenderi tyńdarmandar delebesin qozdyryp, rýhyn aspandatty. 210 myńǵa jýyqtaǵan altaılyqtar arasynan sýyrylyp shyqqan óner maıtalmandaryna shynaıy yqylaspen soǵylǵan shapalaq olarǵa shabyt syılady.

Budan ári sharaǵa qatysýshylar kezekpen sóz sóılep, qonaqtarǵa alǵys bildirýmen qatar, birqatar usynys-pikirlerin aıtty. Yrystý men Altyn-Aı sekildi daryndarmen birlese jumys jasap, tamyrlas eldiń salt-dástúrleri men tarıhyn zertteý, ǵylymı kitaptaryn shyǵaryp, jalpy ártúrli rýhanı sala boıynsha ortaq jobalar jasaý máselesi sóz boldy. 


 

Pikirler