Halyq Saǵyntaev pen prokýrordy alańǵa shaqyrdy (foto, vıdeo)

4766
Adyrna.kz Telegram

Búgin, 27 aqpan kúni Aqmola oblysy Talapker aýylynda eki kún buryn Nur-Sultandaǵy tergeý ızolıatorynda qaıtys bolǵan belsendi Dýlat Aǵadildi sońǵy saparǵa shyǵaryp saldy.

Almatydan topyraq salýǵa bara almaǵan, qoǵamdyq belsendiniń jumbaq ólimine ashýlanǵan jurtshylyq ońtústik astananyń Respýblıka alańynda narazylyq sharasyn ótkizdi.

Bir saǵatqa sozylǵan qaraly mıtıngiden keıin kópshilik 22 aqpan kúni mıtıngide qamalǵandardy bosatý týraly talappen qalalyq prokýratýrany betke aldy.

Prokýratýranyń aldyndaǵy "prokýror shyq" dep aıqaılaǵan talapshyl topqa qala prokýrorynyń orynbasary men kómekshisi shyǵyp, belsendilerdiń ókilderin qabyldaýǵa, kelissóz júrgizýge ázir ekendikterin bildirdi. Biraq prokýrordyń ózi kelsin degen halyq talabynan keıin orynbasar men kómekshi ishke kirip ketti.  Prokýror da kóp aldynda boı kórsetpedi.

Buǵan narazylyq tanytqan jınalǵan jurt qalalyq ákimdikti betke aldy. Baǵanadan beri halyqtyń qımylyn baqylap kele jatqan arnaıy kóliktegi polıııanyń arnaıy jasaǵy ákimdiktiń aldyn qorshap úlgerdi.

Jasaral Qýanyshálın bastaǵan belsendiler "Saǵyntaev shyqsyn, sosyn baryp talaptaryn aıtatynyn" málimdedi. Ákimdiktiń ókili shyqqanymen onymen kelissóz júrgizýden bas tartqan belsendiler ákim shyqpaı tura beretinderin aıtty.

Ákimniń ornynda joq ekenin taǵy bir kelip málimdegen ákimdiktiń ókiliniń sózinen keıin Dýlat Aǵadildiń rýhyna Quran baǵyshtaǵan kópshilik 1 naýryz kúni qaıtadan ákimdik aldyna jınalmaq bolyp tarqady.

 

 

 

 

Ońǵar Qabden,

"Adyrna" ulttyq portaly

Pikirler