Turǵyn úı taýqymetin tartqan jalǵyzbasty ana Aıgúl Sadyqova úsh balasymen birge jyldar boıy aýyldaǵy ǵımarattyń bólmesin jaldap kelgen. Jupyny lashyqty panalaǵan jandarǵa turaqty qamqorlyq kórsetip keletin Qazyǵurt aýdanynyń basshylyǵy bul otbasyna demeýshi taýyp berdi. Jergilikti kásipker qaıyrymdylyq jasap, múmkindigi shekteýli bala asyrap otyrǵan anaǵa 4 bólmeli úı salyp berdi, dep habarlaıdy oblys ákimdiginiń baspasóz qyzmeti.
"Bolashaq" móltek aýdanynda ornalasqan jańa úı jaryq pen tabıǵı gazben qamtylyp, aýyz sý júıesi júrgizilgen. Óńirde qarqyn alǵan "Qamqorlyq" jobasy aıasynda Qazyǵurt aýylynyń kásipkerleri jumyssyz ananyń jańa qonysyna úı-jıhazdaryn tartý etip, azyq-túlik alyp berdi. Basybaıly baspana buıyrǵan otbasyndaǵy balalardyń qýanyshynda shek joq. Jyldar boıǵy qıyndyqtan qutylǵanyn jandardyń aıtar alǵysy aıryqsha.
Túrkistan oblysynda júzege asyp jatqan "Qamqorlyq" baǵdarlamasy ózińde bardy ózgemen bólisý, muqtaj, kóńili jarym jandarǵa qol ushyn berýdi meńzeıdi. Qazyǵurt aýdany boıynsha 86 otbasyna osy baǵdarlamasy aıasynda jetekshi bekitilip, jan-jaqty kómek kórsetilgen. Jaqsy iske janashyr izgi nıetti, aq tileýli azamattar áleýmettik jaǵdaıy tómen muqtaj jandarǵa turmysqa qajetti zattaryn, kómir, otynyn molynan úılestirýde. Atalǵan sharaǵa aýdan, qala jáne aýyl ákimdikteri, "Nur Otan" partııasy Túrkistan oblystyq fılıalynyń belsendileri, máslıhat depýtattary men kásipkerler demeýshilik jasap, atsalysyp jatyr. Jalpy, oblys boıynsha 2 myńǵa jýyq otbasyna joba aıasynda jan-jaqty qamqorlyq jasalmaq.
