Jambyl oblysy Qordaı aýdanynda bolǵan jappaı tártipsizdikter kezinde bassaýǵalap kórshi Qyrǵyzstan aýmaǵyna ótip ketken 8 myńǵa jýyq qazaqstandyq elge qaıtaryldy. Bul týraly búgin Nur-Sultandaǵy úkimet otyrysynda Jambyl oblysynyń ákimi Berdibek Saparbaev habarlady. Ákim oblystaǵy qazirgi jaǵdaıdy "turaqty" dep sıpattady dep habarlaıdy "Azattyq" radıosy.
"Eki kúnniń ishinde segiz myńǵa jýyq azamat (Qyrǵyzstannan Qazaqstanǵa) qaıtaryldy. Kesheden bastap mektep, balabaqshanyń barlyǵy burynǵydaı jumys istep jatyr. Barlyq saýda dúkenderi de jumysyn bastady" dedi ol.
Sonymen birge Saparbaev Qordaıdaǵy oqıǵalar kezinde 19 polıııa qyzmetkeri zardap shekkenin aıtty.
"Bes kúnniń ishinde dárigerdiń kómegine 141 adam júgingen, sonyń 19-y – quqyq qyzmetkerleri. On adam qaza tapty. Qurban bolǵandardyń barlyǵynyń otbasyna járdem kórsetilip jatyr" dedi ákim.
Saparbaevtyń aıtýynsha, qazirgi kezde Qordaı aýdandyq aýrýhanasynda 13 adam emdelip jatyr, taǵy 20 adam – Almaty aýrýhanasyna jatqyzylǵan. Buǵan qosa sheneýnik Qyrǵyzstan aýrýhanasyndaǵy qazaqstandyqtardyń elge jetkizilgenin habarlady.
"Qyrǵyzstanda bolǵan adamdardy Almaty men Tarazǵa jetkizdik. Qazir onda (Qyrǵyzstanda – red.) eshkim qalǵan joq" dedi ákim.
Úkimet otyrysynan keıin jýrnalıster saýalyna jaýap bergen oblys ákimi qazirgi ýaqytta Qordaı aýdanynda jappaı qaqtyǵys saldarynan kelgen shyǵyn kólemi anyqtalyp jatqanyn, onyń esebi shyqqan soń zııan shekkenderde ótemaqy tóleý týraly úkimetke usynys engiziletinin málimdedi.
Qordaıdaǵy oqıǵalar memlekettiń áleýmettik saıasaty sátsiz bolǵanyn bildirmeı me degen saýalǵa Saparbaev "áleýmettik saıasat eshqandaı sátsiz bolǵan joq, bul Qazaqstanda ǵana emes, basqa elderde de bolatyn jaǵdaı" dep jaýap berdi. Saparbaev oqıǵany "ultaralyq qaqtyǵys" degen sıpattaýmen kelispeıtinin aıtty. "Bul jerde ultaralyq másele joq, bul turmystyq daýdan týyndady, jaqyn arada naqty bir sheshim shyǵaryp, tıisti shara qoldanamyz" dedi oblys ákimi.
Dúısenbi kúni Qazaqstan prezıdentiniń jarlyǵymen premer-mınıstrdiń orynbasary qyzmetindegi Berdibek Saparbaev Jambyl oblysynyń ákimi bolyp taǵaıyndalǵan. 11 aqpanda Saparbaev Jambyl oblysyndaǵy jappaı qaqtyǵystardan keıin qurylǵan úkimettiń arnaıy komıssııasynyń jetekshisi bolyp qalatynyn aıtty.
Aqpannyń 8-ine qaraǵan túni Jambyl oblysy Qordaı aýdanynda bolǵan jappaı qaqtyǵystar saldarynan, resmı derek boıynsha, 10 adam qaza taýyp, ondaǵan adam jaralandy. Jappaı tártipsizdikter Qyrǵyzstanmen shekaraǵa jaqyn ornalasqan, negizinen etnıkalyq dúngender turatyn Masanchı, Sortóbe, Aýqatty aýyldarynda bolǵan. Janjal barysynda turǵyndar menshigindegi ondaǵan ǵımarat pen ózge de dúnıe-múlik órtenip, búlingen.
Janjaldan soń myńdaǵa adam Qazaqstannan Qyrǵyzstanǵa qashyp ótken. 9 aqpanda Qazaqstan bıligi Qyrǵyzstanǵa ótip ketkenderdiń keıbiri úılerine orala bastaǵanyn málimdedi.
Halyqaralyq basylymdar etnıkalyq qaqtyǵys dep sıpattaǵan janjaldan keıin úkimet arnaıy komıssııa quryp, aýdanda tótenshe jaǵdaı jarııalandy. Bılik Qordaıdaǵy oqıǵalardy "turmystyq janjal" dep atap, oǵan baılanysty 25 qylmystyq is qozǵalǵanyn habarlady.
