Ótken túnde Jambyl oblysynyń Qordaı aýdanynda quqyqtyq tártipti buzý faktileri tirkelgen joq. Jaǵdaı turaqtaldy, aýyldyqtardyń ómiri qalypty arnasyna túsýde. Bul týraly primeminister.kz habarlaıdy.
Úkimet komıssııasy jumysynyń ekinshi kúnin aýyldar men shekara mańy ótkizý pýnktterin aralaýdan bastady.
«Qarasý» shekara beketinde adamdar joq, al Qyrǵyzstannan kelgen adamdar kezegi «Aýqatty» pýnktinde paıda bolǵan. Bular - osyǵan deıin kórshiles respýblıkaǵa ketip qalyp, endi úılerine oralyp jatqan qazaqstandyqtar. Olardyń ishinde áıelder men balalar kóp.
Berdibek Saparbaev otandastarymyzdan sabyrlyq saqtap, arandatýlardyń yqpalynda ketpeýdi surady.
«Sizderden arandatýlarǵa ermeýdi suraımyz. Buzylǵan barlyq úılerdi biz qalpyna keltiremiz, otbasylarǵa kómek kórsetemiz. Bizdiń mamandar jumys istep jatyr, zalaldy baǵalaýda. Bizdiń barlyǵyńyzǵa taǵy aıtarymyz, ketip qalǵan, qazir Qyrǵyzstanda óz týystaryn panalap jatqan jaqyn-jýyqtaryńyzǵa elge qaıtý kerektigin jetkizseńizder», - dedi B. Saparbaev ótkizý pýnktinde jınalǵan qaýymǵa.
B. Saparbaev aýdandaǵy jaǵdaıdyń turaqtalǵanyna sendirip:
«Prezıdent tapsyrmasy boıynsha munda arnaıy Úkimet komıssııasy keldi, onyń quramynda memlekettik jáne quqyq qorǵaý organdarynyń basshylary bar. Ótken táýlikte eshqandaı oqıǵa da, quqyq buzýshylyq ta bolǵan joq. Jaǵdaı turaqtaldy. Quqyq qorǵaý organdarynyń kúshiniń arqasynda tártip pen qaýipsizdik ornatyldy. Taǵy da sizderden arandatýlarǵa ilespeýdi suraımyz», - dedi.
Aıta keteıik, elge oralyp jatqan qazaqstandyqtar shekaradan jeńildetilgen rejımde ótedi.
