Meırambek Besbaev májilis depýtaty Zaǵıpa Balıeva jumysyna kedergi keltirip, qysym kórsetip jatqanyn málimdegen edi
Ánshi Meırambek Besbaev depýtat Zaǵıpa Balıevamen aradaǵy jaǵdaıǵa baılanysty kelissózder júrgizilip, ortaq sheshimge kelgenderin habarlady. Bul týraly "Sputnik.kz" habarlaıdy.
Bul týraly ánshi Instagram jelisindegi paraqshasynda jazdy.
"Kesheli beri Qazaqstan oryndaýshylary odaǵy mańyndaǵy órbigen jaǵdaıǵa baılanysty kelesini habarlaımyn. Búgin uıymnyń burynǵy basshylyǵymen kezdesý ótkizdim. Ortada qalyptasqan barlyq máseleler boıynsha kelissózder júrip, ortaq sheshimge keldik. Birinshiden, meniń zańdy túrde basshy retinde ádilet organdarynda tirkelýime burynǵy basshylyq eshqandaı kedergi keltirmeıtin boldy. Ekinshiden, odaqtyń basqa uıymdar men qurylymdardyń aldyndaǵy mindettemelerin burynǵy basshylyq jáne biz eki jaqtap sheshetin boldyq", - dep jazdy Besbaev.
Ánshiniń aıtýynsha, óz tarapynan uıymnyń bolashaqtaǵy barlyq jumysy taza, ashyq júrgiziledi. Qol jetkizilgen taǵy bir kelisim - keı sharýalarǵa qatysty burynǵy basshylyq naqty aqparat berip otyratyn boldy.
"Bir eldiń balalary bolǵandyqtan, sózge toqtaǵan tekti halyqtyń urpaǵy bolǵandyqtan, biz ortaq mámilege keldik. Sol sebepten, qazaqtyń kórnekti memleket qaıratkeri, qurmetti apaıymyzǵa qatysty keshe jarııalaǵan postymdy alyp tastaımyn. Keshe oryn alǵan máseleni ary qaraý ýshyqtyrmaı, tez arada sheshilýine yqpal etken Zaǵıpa Iahııaqyzyna alǵys aıtamyn! Meni qoldap, jyly sózin aıamaı jatqan barlyq aǵaıynǵa Alla razy bolsyn", - degen ánshi óz jazbasynda.
Aıta keteıik, Meırambek Besbaev májilis depýtaty Zaǵıpa Balıeva jumysyna kedergi keltirip, qysym kórsetip jatqanyn málimdegen edi. Ol depýtattan ánshilerdiń sharýasyna aralaspaýdy talap etti. Al Balıeva óziniń esh qatysy joq ekenin aıtyp, ánshiniń qońyraýyn kútip otyrǵanyn habarlaǵan bolatyn.
Meırambek Besbaev 15 qańtarda Qazaqstan oryndaýshylar odaǵynyń basqarma tóraǵasy bolyp saılandy.
