Shertpe kúıdiń sheberi Táttimbet Qazanǵapulynyń Qurmanǵazy Saǵyrbaıulymen túsken kóne sýreti tabyldy. Tarıhı jádiger osy ýaqytqa deıin kúıshiniń Omby qalasyna qonystanǵan sanaýly urpaqtarynyń birinde saqtalyp kelgen. Bul týraly Omby qalasynda turatyn kúıshiniń besinshi urpaǵy, 66 jastaǵy Moldabek Zikirshın habarlap otyr.
QR Ulttyq muraǵattyń qoǵammen baılanys jónindegi qyzmetiniń habarlaýynsha, tarıhı sýret týraly Moldabek Zikirshın uzaq ýaqyttan beri eshkimge aıtpaǵan. Aıtýynsha, ol sýretti atasy Zikirshi ómirden óter aldynda amanattap, ákesi Tóremuratqa joǵaltyp almaýyn qatty tapsyrǵan. Onyń atasy Zikirshi Qazanǵapov 1948 jyly Semeı qalasynda súzek syrqatymen ómirden ótken. Qazir bul sýretti elge jetkizip, ulttyq mýzeıge tapsyrý úshin dáýlesker kúıshiniń urpaqtarymen kelisim júrgizilýde. Sýrette qıly zamanda qýǵyn kórip, Arqadaǵy Táttimbet Qazanǵapulyn saǵalap kelgen Qurmanǵazy Saǵyrbaıly beınelengen. Kóne sýrettiń túsirilgenine bir jarym ǵasyrǵa jýyq ýaqyt bolsa da, uqypty saqtalypty.
Sonymen qatar, Moldabek Zikirshın Táttimbet kúıshiniń Qarqaraly ýeziniń aǵa Sultany Qunanbaı Óskenbaevqa Kenesary Qasymulyna kómek berýge at salysý týraly 1849 jyly jazǵan tarıhı hatyn saqtap kelipti. Aǵa Sultanǵa jazylǵan qos paraq hat ýezdi bılegen bıge der kezinde jetpeı qalyp, Táttimbettiń ózine qaıtyp kelgen. Tóte jazýmen jazylǵan kóne hatta Kenesary hanǵa kómek kórsetýden bólek, maldyń jazǵy jaıylymynyń tarylyp bara jatqandyǵy men Qarqaralynyń tóńiregine orystardyń jappaı qonystanýyna nazarylyq bildirgen eldiń muńy aıtylǵan. Aldaǵy kúnde bul qos jádiger elge jetkizilip, Astanadaǵy ulttyq murajaıǵa jaıǵasatyn bolady. Qazir elimizdiń zııaly qaýym ókilderimen birlesip, qymbat qazynany elge aldyrý máselesi týraly beıresmı kelissóz jumystary atqarylýda. Sebebi, mundaı qymbat qazynany Omby qalasyndaǵy Orta Azııa murajaıy satyp alýǵa nıet bildirip otyr.
Osydan 9 jyl buryn Abylaı han men Qazybek bıdiń shapany, sondaı-aq, Bógenbaı batyrdyń synǵan semser qylyshy olardyń urpaqtarynan memleket ıelegine qabyldanǵan edi. Ol ýaqytta mundaı ıgi iske qoǵam qaıratkerleri Myrzataı Joldasbekov, Ábish Kekilbaev syndy el aǵalary jumyldyrylǵan-tyn. Qazirgi tańda, Myrzataı Joldasbekovteı úlken kisilerdiń alys jolǵa shyǵýǵa densaýlyǵy syr berýine baılanysty akademık Tursyn Jurtbaı, aqyn Júrsin Erman jáne aıtysker aqyn Amanjol Áltaev syndy eldiń ıgi jaqsylary jumyldyrylyp otyr.
Eske sala keteıik, Táttimbet Qazanǵapuly 1815-1862 jyldar aralyǵynda Qarqaraly ýezi, Túndikti bolysynda týyp, sol jerde ómirden ótken. Qazaqtyń kúıshi-kompozıtory, dombyrashy, shertpe kúıdiń sheberi, oryndaýshylyq mektebiniń negizin qalaýshylardyń biri, halyq kúı óneriniń klassıgi.
Eskertý: Joǵardaǵy sýret ǵalamtordan alyndy
