Naqty ýaqyty esimde joq: 2005 jylǵy jazdyń bir kúni Zamanbek aǵa telefon soqty.
«Áı, sen bossyń ba?».
«Bospyn... Jaıshylyq pa?».
«Qazir úıińniń janynan ótem, meniń mashınamnyń sońynan eretin bol!».
«Qaıda baramyz?».
«...»
Nusqasy noqtaǵa tar Nurqadilov ádettegi short minezimen sózdi sholaq doǵardy.
Kóshe boıynda qara «Mersedesti» kútip turmyn. Kóligi qasymnan zý etip óte bergende, sońynan erdim. Sol júıtkigen boıda Almatynyń syrtyndaǵy «Alataý» sanatorııiniń shlagbaýmyna tireldik. Ádettegi birli-jarym kúzetshi emes, topyrlaǵan kástóm kıgender tolyp júr. Zákeńniń mashınasyn ótkizdi, maǵan «bolmaıdy» dedi. Daýlasatyn emes, tústeri sýyq, qorǵannyń syrtynda qaldym.
Dereý telefonǵa jarmastym.
«Men... meni... ótkizbedi...».
«Sol jerde kút...».
Taǵy da kelte qaıyrdy.
Bir saǵat turmyn. Eki saǵat... Úsh saǵat degende, Zákeńniń kóligi kórindi. Taǵy da janymnan zý etip óte shyqty. Taǵy da erip kelem. Telefonym bezildeı jóneldi.
«Saǵat beste Maqpaldyń shaıyn ishem, sodan soń úıge kel...».
Daýysy bir túrli. Doǵaldaý dińin bilem: «Jaraıdy» dedim.
Aıtylǵan ýaqytta keldim. Úıiniń irgesindegi búginde mýzeıi bolǵan shtab-páterinde eken. Qyzyńqy.
«Nazarbaevpen jolyqtym...».
«Iá...».
«Ne ıá?! Mas eken... Sý iship otyrǵan staqanyn toltyryp, araq quıdy da, «ish» dedi. Áńgimeniń aýany aýyr bolaryn sezip, dem almaı tartyp saldym...».
«Ne qyl deıdi?».
«Saǵan ne kerek: aqsha ma, qyzmet pe, nah...?» dep, boqtap sóıledi. Men de «ketseń – ket» dep, tizgindi jiberdim. Maǵan eshteńeń kerek emes, ádil saılaý ótkizeıik dedim. Zaǵıpanyń (Ortalyq saılaý komıssııasynyń tóraıymy – Balıeva) ornyn maǵan bere tur, taza saılaý ótkizip bereıin de, keteıin, nah... Siz de saılaýǵa túsińiz: jeńseńiz – siz jaqtamyn, jeńilseńiz – halyqtyń aldynda abyroımen ketesiz, sizge sonyń ózi ábúıir bolady, tarıhta jaqsy atpen qalasyz dedim».
«Ol ne dedi?».
«Jepsiń!.. Tarıhyńdy neteıin!» dedi. Biraq birer kúnde habarlasam dedi».
«Al endi bul netistegi meniń mindetim qandaı?».
«Úsh kún kútemin. Úsh kúnnen keıin press-konferenııa ótkizip, jaǵdaıdy jaıyp salam... Sen Seıtqazymen (Mataev) sóılesip, press-klýbqa zakaz berip qoı...».
Bul jeksenbi kúni bolatyn. Erteńinde – dúısenbide Zákeń telefon soqty: «Press-konferenııany búgin ótkizemiz...» dedi.
«Ne? Jaýaby durys pa?».
«Poshel on nah...! Óz obaly ózine!».
Zákeń saǵat 12-de baspasóz máslıhatyn ótkizip, ekeýara bolǵan boqtyq pen ishisten basqasyn jaıyp saldy: «Nazarbaev ólmeı – ketpeıdi, saılaý ádil bolady dep oılamańdar! Meniń ázirge qolymnan kelgeni osy...» – dedi.
«Ázirge» – qazirge ulaspady. Nazarbaev ólgen joq, áli otyr... Zákeńniń kózin qurtty... Budan 15 jyl burynǵy qazaq – qazir de sol qazaq...
Ermurat BAPI
«DAT». 16.01.2020.
