Áldı- áldı, aq bópem,
Aq besikke jat bópem!
Jylama, bópem, jylama,
Jilik shaǵyp bereıin,
Baıqutannyń quıryǵyn
Jipke taǵyp bereıin.
Arsha ma eken besigi?
Alar ma eken ákesi?
Órik pe eken besigi?
Súıe me eken ákesi?
Jıde me eken besigi?
Áldı-áldı, appaǵym,
Qoıdyń júni qalpaǵym…
Sábı tárbıesi men minez-qulqyn qalyptastyrýda besik jyrynyń orny múlde bólek. Ol balanyń kókirek kózin ashady, jan-júıesin terbeıdi, sezimin sergitedi, kóńil-kúıin kóteredi. Eseıe kele ónerge, sóz ónerine beıimdeledi. Áje men ananyń áldıi sábıdiń alǵashqy óner mektebi ekeni barshaǵa belgili.
Uly Abaıdyń «Týǵanda dúnıe esigin ashady óleń» deýi tegin emes. Besik jyrynda ulttyq tárbıeniń úzdik úlgisi jatyr. Alaıda sońǵy jyldarda besik terbetip otyryp besik jyryn aıtatyn áje, ana azaıdy.
Besik terbetetin balanyń ózi bópesin óleń aıtyp uıyqtatatyn. Buryn ananyń besik jyryn sábı ǵana emes, aýyl balalary, tipti úlkender de qulaǵyn salyp tyńdap otyratyn. Keıingi kezderde jastardyń halyq ánine nazar aýdarmaýy, óleńge áýestenbeýiniń bir sebebi – osy besik jyrynyń umytylýynda bolsa kerek.
