Jambylda jyl sońyna deıin 40 sport alańsha paıdalanýǵa beriledi

766

El Úkimeti buqaralyq sportty damytýǵa aıryqsha nazar aýdaryp otyr. Al buqaralyq sporttyń damýy úshin azamattarǵa qolaıly sport saraılary men sport alańshalary salynýy kerek.

Bul baǵytta Jambyl oblysy jospar boıynsha aýqymdy jumys atqaryp otyr. Aımaq basshysy Asqar Myrzahmetovtiń tapsyrmasyna sáıkes, oblysta shaǵyn sport alańshalaryna túgendeý júrgizilgen bolatyn. Osy saraptamanyń arqasynda óńirge 266 sport alańshasy qajet ekeni nayqtalyp, naqty tapsyrma berildi. Máselen bıyl óńirde 174 sport alańshasyn salý joparlansa, búginde onyń basym bóligi paıdalanýǵa berildi. Naqtyraq aıtsaq, bıyl jyl basynan beri 134 sport nysany paıdalanýǵa berilgen. Jyl sońyna deıin taǵy 40-y ashylyp, sportpen shuǵyldanamyn degen azamattarǵa zor múmkindik týmaq.. Al, qalǵan 92 nysannyń máselesi 2020 jyly tolyq sheshiledi dep kútilýde.

Oblystyq sport basqarmasynyń basshysy Nurbol Júnisbekovtyń aıtýynsha, Jambyl oblysynyń 80 jyldyǵyna oraı Taraz qalasynda birneshe sport alańshalary paıdalanýǵa berildi. Solardyń biri «Jansaıa» móltek aýdanynda ornalasqan «Alash Arena» kishi fýtbol alańshalar kesheni.

«Jyl basynda oblys boıynsha 174 sport alańshasyn ashý josparlansa, «Alash Arena» 134-shi sport alańshasy. Qalanyń halyq kóp shoǵyrlanǵan aımaǵynan boı kótergen ǵımarat, jeke kásipkerlerdiń qarjysyna salynǵan. Keshende standartqa saı 2 kishi fýtbol alańshasy, zamanaýı úlgidegi jattyǵý zaly men arnaıy kıim keshek aýystyratyn jáne jýynýǵa arnalǵan bólmeleri bar. Jyl sońyna deıin jospar tolyq oryndalyp, keler jyly 92 alańsha beriledi dep kútilýde. Al, bıyl Taraz qalasy aýmaǵynan 15 sport alańshasy boı kóterse, onyń altaýy bıýdjet esebinen, qalǵan toǵyz sport alańshasy jeke kásipkerlerdiń qarjysyna salynǵan. Sonymen qatar jergilikti bıýdjet esebinen birqatar sport alańshalary qalpyna keltirilgen. Qazirgi jastardyń kásibı sportshy deńgeıine jetýi úshin, osyndaı sport alańshalar septigin tıgizedi», – dedi Nurbol Júnisbekov.

Basqarma basshysy jergilikti turǵyndardyń dene shynyqtyrýmen aınalysýy úshin demeýshiler kómegimen 400 adamǵa arnalǵan 1 sport kesheni salyndy, bıýdjet esebinen taǵy ekeýiniń qurylysy júrgizilýde. Aıta keteıik, jyl basynan beri oblys sportshylary iri halyqaralyq jarystarǵa qatysyp, 14 sportshy júldeli oryndardy ıelense, onyń 1-i Álem chempıony atandy.

«ADYRNA»

ulttyq portaly

Pikirler
Redakııa tańdaýy