Almatyda özınıŋ qyzmetkerın zorlady degen küdıkpen LGBT belsendısı 2 aiǧa qamaldy. Atalǧan jaǧdaiǧa bailanysty Almaty qalalyq Polisiia departamentınıŋ baspasöz qyzmetı pıkır bıldırdı, dep habarlaidy “Adyrna”.
Äleumettık jelılerde özın Elisei dep tanystyrǧan azamattyŋ zorlyq körgenı turaly aitqan beinejazbasy taraǧan bolatyn. Vileoda jäbırlenuşı tüngı mekemede jūmys ısteitının aityp, bastyǧynan zorlyq körgenın mälımdegen.
“Medeu audandyq polisiia Basqarmasy qylmystyq ıs qozǧady. Jedel-ızdestıru ıs-şaralary barysynda jäbırlenuşınıŋ jeke basy anyqtalyp, ol polisiiaǧa resmi türde aryzdandy. Küdıktı retınde 29 jastaǧy azamat — atalǧan mekemenıŋ basşysy ūstalyp, uaqytşa ūstau izoliatoryna qamaldy. Qazırgı uaqytta qajettı tergeu amaldary jürgızılıp jatyr. Tergeu barysynda küdıktınıŋ äreketıne qūqyqtyq baǧa berıledı, onyŋ ışınde mälımdelgen jaǧdailar eskerıletın bolady. Aldyn ala tergeudıŋ barysy Almaty qalalyq polisiia Departamentı basşylyǧynyŋ baqylauynda”,– delıngen habarlamada.
Oqiǧa Almatydaǧy “Amirovka” atty tüngı mekemede bolǧan. Būl mekeme LGBT qauymdastyǧy ökılderınıŋ bas qosatyn orny retınde tanylǧan. Tüngı klub äkımşılıgı oqiǧaǧa bailanysty pıkır bıldırıp, LGBT belsendısı ärı bardyŋ iesı Amir Şaikejanovtyŋ basşylyq qyzmetınen şettetılgenın habarlady.
“Bız zorlyq-zombylyqtyŋ, harassmenttıŋ, şekara būzudyŋ, kvirfobiianyŋ jäne adam qadır-qasietıne qūrmetsızdık bıldıretın kez kelgen ärekettı qataŋ aiyptaimyz. Zorlyq tek niet mäselesı emes, onyŋ saldary da maŋyzdy ekenın tüsınemız. “Amirovka” qyzmetkerı Elisei men onyŋ negızın qalauşy Amir arasyndaǧy özara äreketke bailanysty aqparattar tarady. Bız Eliseige küş-jıger men sauyǧu tıleimız. Osy jaǧdaidyŋ saldaryn qaita qarau kezeŋınde Amir basqaruǧa, şeşım qabyldauǧa jäne “Amirovka” atynan köpşılık aldynda söileuge öz erkımen şettetıledı. Barlyq funksiialar bızdıŋ komandaǧa berıledı”, – delıngen klub mälımdemesınde.
