Qazaqstannyŋ bırqatar aimaǧynda 40 gradusqa deiın ystyq bolady. Būl turaly «Qazgidrometke» sılteme jasap, Tötenşe jaǧdailar ministrlıgı mälımdedı, dep habarlaidy ”Adyrna” ūlttyq portaly.
«Qazgidromettıŋ» mälımetınşe, 16-17 mamyr künderı Almaty oblysynyŋ batysy men soltüstıgınde, Jetısu oblysynyŋ oŋtüstıgınde, şyǧysynda jäne Abai, Şyǧys Qazaqstan oblystarynyŋ oŋtüstıgınde kün qatty ysyp, 40 gradusqa deiın jetedı.
Būl künderı Almatyda kün 35 gradusqa deiın ysidy. Al Qonaevta 37 gradus ystyq bolady degen boljam jasaldy.
Jambyl oblysynda synap baǧanasy 40 gradusqa deiın köterılse, Qyzylorda oblysynda 40-44 gradus qatty ystyq saqtalady.
Sondai-aq Qaraǧandy oblysynda 35 gradus, Ūlytau oblysynda 35-37 gradusqa deiın ystyq bolady.
Aptap ystyqqa bailanysty atalǧan öŋırlerde joǧary ört qaupı saqtalady.
Al Astana, Kökşetau Soltüstık Qazaqstan, Pavlodar, Qostanai oblystarynda naizaǧai oinap, jel soǧady. Atalmyş aimaqta jel küşeiıp, tūman tüsedı. Pavlodar jäne Qostanai oblystarynda būrşaq tüsuı mümkın.
Eldıŋ batys aimaǧy – Atyrau, Batys Qazaqstan, Aqtöbe, Maŋǧystau oblystarynda jel ekpını küşeiıp, naizaǧai kütıledı.
18 mamyrdan bastap eldıŋ soltüstıgı men ortalyq öŋırlerınde kün raiy kürt özgerıp, aua temperaturasy 10-15 gradusqa deiın tömendep, qatty jaŋbyr jauady. Atap aitqanda Soltüstık Qazaqstan, Aqmola oblystarynda jaŋbyr, naizaǧai, būrşaq, dauyl bolady dep kütıledı. Astana qalasynda qatty dauyl bolyp, jaŋbyr jauyp, soŋy būrşaqqa ainaluy mümkın.
Kün raiy Ūlytau oblysy men Qaraǧandy oblysynda da däl osylai özgeruı mümkın. Būl aimaqtarda da dauyl, naizaǧai, jaŋbyr kütılıp, soŋ būrşaqqa ainaluy mümkın.
