Aqtöbe oblysynyŋ prokuraturasy «Aqtöbe» futbol klubynda ırı kölemdegı qarjylyq zaŋbūzuşylyqtardy anyqtady, dep habarlaidy "Adyrna" ūlttyq portaly.
Bas prokuraturanyŋ tapsyrmasy boiynşa jürgızılgen tekserıs barysynda 250 million teŋge kölemınde qarjy jymqyrylǧany belgılı boldy.
«Anyqtalǧan zaŋbūzuşylyqtar arasynda – oiynşylardy transferleuge jäne äue saparlaryn ūiymdastyruǧa qatysty kümändı kelısımşarttar bar. Sonymen qatar, futbolşylardy tamaqtandyruǧa arnalǧan qarajat klub äkımşılıgınıŋ jeke qajetıne jūmsalǧan», – dep mälımdedı vedomstvodan.
Tekserıs qorytyndysy boiynşa asa ırı kölemde qarjy jymqyru, qyzmettık ökılettıgın asyra paidalanu jäne alaiaqtyq baptary boiynşa üş qylmystyq ıs qozǧaldy.
Materialdar Sybailas jemqorlyqqa qarsy ıs-qimyl agenttıgıne joldandy. Tergeu barysy oblys prokurorynyŋ baqylauynda.
