Tesla 2025 jyldyń birinshi toqsanynda 409 mıllıon dollar taza paıda tapqan. Bul ótken jyldaǵy 1,4 mıllıard dollarmen salystyrǵanda áldeqaıda az. Bul týraly The New York Times basylymy jazdy, dep habarlaıdy “Adyrna” ulttyq portaly.
Basylymnyń jazýynsha, kompanııanyń satylymynyń tómendeýine Qytaı avtokólik óndirýshilerimen qatań báseke, jańa modelderdiń joqtyǵy jáne Ilon Masktyń saıası belsendiligi sebep bolyp otyr. Masktyń ońshyl kúshterdi qoldaýy brendten birqatar satyp alýshylardy, ásirese lıberaldy jáne ortasha kózqarastaǵylardy alystatyp jibergen.
Soǵan qaramastan, Tesla naryqtyq kapıtalızaııasy boıynsha álemdegi eń qymbat avtokólik óndirýshi bolyp qalýda jáne AQSh-tyń elektromobıl naryǵynda kóshbasshy orynǵa ıe.
Alaıda, jeltoqsannan beri kompanııanyń akııalary shamamen eki esege arzandady, ınvestorlar kompanııanyń bolashaǵyna kúmán keltirip, Masktyń AQSh prezıdenti Donald Tramptyń ákimshiligindegi róline alańdap otyr.
«Tesla óz naryq úlesin Qytaı brendteri men elektromobılderdi belsendi túrde damytyp jatqan GM, Volkswagen jáne Hyundai sııaqty iri avtokonernderge berip jatyr», – dep jazylǵan maqalada.
Kompanııa buǵan deıin onjyldyqtyń sońyna deıin jylyna 20 mıllıon kólik satýdy josparlaǵan bolatyn. Alaıda, 2023 jyly 1,8 mıllıon kólik satylǵannan keıin, satylym tómendeýde. Ótken jyly Tesla 1,7 mıllıon kólik satty, al 2025 jyldyń birinshi toqsanynda satylym ótken jyldyń osy kezeńimen salystyrǵanda 13 paıyzǵa qysqardy.
Tesla-nyń eń jańa modeli – Cybertruck – álsiz nátıjeler kórsetip otyr. Cox Automotive málimetinshe, 2025 jyldyń birinshi toqsanynda onyń satylymy 2024 jyldyń tórtinshi toqsanymen salystyrǵanda shamamen 50 paıyzǵa azaıǵan.
Kompanııa jaqynda Cybertruck modeline 8 500 dollarǵa deıin jeńildikter usyndy. Bul kóliktiń bastapqy baǵasy salyqtyq jeńildikterdi eseptemegende 70 myń dollardan bastalady.
Avtoóndirýshi maýsym aıynyń sońyna deıin arzandaý jańa kólik modelin satylymǵa shyǵaratynyn ýáde etken. Bul keńirek aýdıtorııaǵa elektromobıl satyp alýǵa múmkindik berip, satylymdy jandandyrýy múmkin edi. Alaıda, kompanııa ázirge bul kóliktiń prototıpin de kórsetken joq. Kóptegen belgiler onyń iske qosylýy keıinge qaldyrylýy múmkin ekenin kórsetip otyr. Bul múlde jańa model bola ma, álde Model 3 ne Model Y-diń arzandatylǵan nusqasy bola ma – ázirge belgisiz.
