Qostanaıda qaza tapqan 7 jastaǵy qyzdyń ata-anasy balasynyń ólimine dárigerlerdi kinálap otyr, dep habarlaıdy "Adyrna" ulttyq portaly TobolInfo saıtyna silteme jasap.
Bir aı boıy respıratorlyq aýrýmen emdelgen qyzdyń ata-anasy №3 emhananyń, jedel járdem men oblystyq balalar aýrýhanasynyń dárigerlerin kinálaýda.
Anasynyń aıtýynsha, 28 aqpanda balasynyń jóteli bastalǵan. №3 emhanada oǵan antıbıotıkter men sıroptar taǵaıyndalǵan. 7 naýryzda dáriger eńbekke jaramsyzdyq paraǵyn jaýyp, mektepke barýǵa ruqsat bergen.
Alaıda birneshe kúnnen keıin jaǵdaıy nasharlap, otbasy qaıta emhanaǵa júgingen. Bul joly "angına" degen dıagnoz qoıylyp, sımptomatıkalyq em taǵaıyndalǵan.
"Bizge únemi 'qyzyńyzda jaı ǵana angına' dep, tek tamaǵyn shaıyńdar dedi. 14 naýryz kúni Tkachýk degen dárigerge bardyq. Sol kezde ózimiz antıbıotıkti aýystyrýdy suradyq. Ol kelisip, dárini aýystyrdy, biraq qyzymnyń qyzýy túspedi", – deıdi anasy.
Qaıta júgingennen keıin qyz bala aýrýhanaǵa jatqyzylyp, "efazolın" preparaty taǵaıyndalǵan. Biraq anasynyń aıtýynsha, temperatýra tómendemegen, al dárigerler tarapynan der kezinde áreket jasalmaǵan.
Tek aqyly palataǵa aýysqannan keıin ǵana "pnevmonııa" dıagnozy qoıylyp, 18 naýryz kúni naýqas jansaqtaý bólimine aýystyrylǵan.
"18 naýryzda saǵat 16:00-de jubaıym aýrýhanaǵa baryp, qyzymyzdyń jaǵdaıyn suraǵanda 'bári jaqsy' dep jaýap bergen. Biraq 18-inen 19-yna qaraǵan túni qyzym qaıtys boldy", – deıdi ákesi.
Ata-anasy bul jaǵdaıǵa baılanysty polıııaǵa aryz jazdy.
