AQŞ äkımşılıgı Qazaqstannan importtalatyn tauarlarǧa 27% kölemınde kedendık baj salyǧyn engızdı, dep habarlaidy “Adyrna” ūlttyq portaly.
Būl turaly Donald Tramp özınıŋ Truth Social äleumettık jelısındegı paraqşasynda jariialady.
AQŞ-tyŋ jaŋa baj salyǧy negızınen «özara sauda teŋgerımın ornatu» maqsatynda engızılgen. Jariialanǧan tızımge 185 memleket engen. Bazalyq tarif 10% bolǧanymen, keibır elder üşın salyq mölşerı edäuır joǧary bolyp şyqty. Mysaly, Qytaidan importtalatyn tauarlarǧa 34%, Europalyq Odaq elderınen 20%, Şveisariiadan 31%, Ūlybritaniiadan 10%, İzrailden 17%, al Qazaqstannan 27% kedendık salyq salynatyn boldy. Eŋ joǧary baj salyǧy Vetnam (46%), Kambodja (49%) jäne Laos (48%) elderıne engızıldı.
Tramp būl şarany «Bosatu künınıŋ qūrmetıne özara baj salyǧy» dep atap, valiutalyq manipuliasiialar men sauda kedergılerıne bailanysty AQŞ-tyŋ jauapty äreketı retınde sipattady.
AQŞ-tyŋ jaŋa tarifterı Qazaqstandyq metall, auyl şaruaşylyǧy önımderı jäne basqa da tauarlar eksportyna aitarlyqtai äser etuı mümkın. 2024 jyldyŋ qorytyndysy boiynşa Qazaqstan AQŞ-qa 1,97 mlrd dollar kölemınde tauar eksporttap, onjyldyqtaǧy rekordtyq körsetkışke jetken.
Qazaqstannan AQŞ-qa eksporttalatyn negızgı önımder – mūnai, uran (2023 jylmen salystyrǧanda bes ese ösken), ferroqorytpa jäne kümıs. Ūlttyq statistika biurosynyŋ mälımetınşe, AQŞ Qazaqstannyŋ jalpy eksport qūrylymynda 2,4% üleske ie.
Ötken jyly Qazaqstannyŋ negızgı eksporttyq baǧyttary: İtaliia (22,9%), Qytai (18,3%), Resei (11,7%), Niderlandy (6,5%), Fransiia (4,5%) jäne Türkiia (4,1%). Al AQŞ Qazaqstan üşın negızgı importtyq serıktesterdıŋ bırı bolyp tabylady.
AQŞ äkımşılıgı Qazaqstanǧa qatysty būl şeşımdı egjei-tegjeilı tüsındırmedı. Sarapşylardyŋ pıkırınşe, jaŋa tarifter Qazaqstandyq jetkızuşıler üşın qosymşa şyǧyndarǧa äkelıp, AQŞ naryǧyndaǧy bäsekelestıkke kerı äserın tigızuı mümkın.
Ūqsas jaŋalyqtar
