Mäjılıs deputaty Edıl Jaŋbyrşin Qazaqstan Respublikasynyŋ Premer-ministrıne joldaǧan deputattyq saualynda elımızdıŋ ışkı saiasatyna syrtqy küşterdıŋ yqpal etuıne bailanysty mäselelerdı köterdı. Ol būl mäselenı Memleket basşysy Qasym-Jomart Toqaevtyŋ Ūlttyq Qūryltaidaǧy mälımdemesımen bailanystyra otyryp, syrtqy küşterdıŋ ūlttyq müddemızge qol sūǧuyn synǧa aldy.
Deputattyŋ aituynşa, geosaiasi yqpaldy memleketter özderınıŋ jeke müddesın jüzege asyru üşın türlı ädısterdı paidalanyp keledı. Solardyŋ bırı – ūlttyq qūndylyqtardy joiuǧa baǧyttalǧan syrtqy ūiymdardyŋ jūmysy. Äsırese, äsırefeministık, LGBT, emo jäne basqa da submädeniettık qozǧalystar josparly türde milliondaǧan AQŞ dollarymen qarjylandyrylyp, el ışınde türlı äreketter jasaluda.
Būǧan qosa, AQŞ-tyŋ Halyqaralyq damu agenttıgı (USAID) soŋǧy on jylda Qazaqstannyŋ ışkı saiasatyna yqpal etu üşın 150 mln dollardan astam qarajat bölgenı belgılı boldy. Mūndai qarajattar köbınese, ışkı tūraqtylyqqa kerı äser etetın ūiymdardy qoldauǧa baǧyttalǧan.
"Bızde şeteldık granttar arqyly qarjylandyrylatyn keibır ükımettık emes ūiymdar eldegı jaǧdaidy tūraqsyz dep körsetıp, şyndyqqa janaspaityn aqparat taratady. Olarǧa Qazaqstannyŋ jaqsarǧany emes, şaiqalǧany paidaly. Sebebı özderınıŋ jeke basynyŋ paidasyna, iaǧni "gumanitarlyq biznesıne" qarjy kerek," – dedı Edıl Jaŋbyrşin.
Deputat elımızdıŋ ışkı saiasatyna syrtqy küşterdıŋ aralasuyn şekteu üşın Ükımetke naqty şaralar qabyldaudy ūsyndy:
- Qarjylyq baqylau: Qarjy ministrlıgı men tiıstı memlekettık organdar elımızdıŋ ışkı saiasatyna aralasuǧa baǧyttalǧan syrttan qūiylǧan qarjyny anyqtap, tiıstı şaralar qabyldauy tiıs.
- Qūqyqtyq taldau: Şetelden qarjylandyrylatyn ūiymdardyŋ qyzmetın retteitın zaŋnamanyŋ tiımdılıgıne taldau jürgızu qajet.
- Qataŋ baqylau: Şeteldık granttar arqyly qarjylandyrylatyn jobalar men ūiymdardyŋ qyzmetın baqylau jäne retteu mehanizmderın jetıldıru kerek.
- Işkı saiasat tūjyrymdamasy: Memleket basşysynyŋ tapsyrmasyna säikes, elımızde tūŋǧyş ret ışkı saiasat tūjyrymdamasy äzırlenedı. Būl qūjat ūlttyq qūndylyqtarymyzdy negızge ala otyryp, elımızdıŋ ışkı tūraqtylyǧyn qamtamasyz etuı qajet.
