Májilis depýtaty Edil Jańbyrshın Qazaqstan Respýblıkasynyń Premer-mınıstrine joldaǵan depýtattyq saýalynda elimizdiń ishki saıasatyna syrtqy kúshterdiń yqpal etýine baılanysty máselelerdi kóterdi. Ol bul máseleni Memleket basshysy Qasym-Jomart Toqaevtyń Ulttyq Quryltaıdaǵy málimdemesimen baılanystyra otyryp, syrtqy kúshterdiń ulttyq múddemizge qol suǵýyn synǵa aldy.
Depýtattyń aıtýynsha, geosaıası yqpaldy memleketter ózderiniń jeke múddesin júzege asyrý úshin túrli ádisterdi paıdalanyp keledi. Solardyń biri – ulttyq qundylyqtardy joıýǵa baǵyttalǵan syrtqy uıymdardyń jumysy. Ásirese, ásirefemınıstik, LGBT, emo jáne basqa da sýbmádenıettik qozǵalystar josparly túrde mıllıondaǵan AQSh dollarymen qarjylandyrylyp, el ishinde túrli áreketter jasalýda.
Buǵan qosa, AQSh-tyń Halyqaralyq damý agenttigi (USAID) sońǵy on jylda Qazaqstannyń ishki saıasatyna yqpal etý úshin 150 mln dollardan astam qarajat bólgeni belgili boldy. Mundaı qarajattar kóbinese, ishki turaqtylyqqa keri áser etetin uıymdardy qoldaýǵa baǵyttalǵan.
"Bizde sheteldik granttar arqyly qarjylandyrylatyn keıbir úkimettik emes uıymdar eldegi jaǵdaıdy turaqsyz dep kórsetip, shyndyqqa janaspaıtyn aqparat taratady. Olarǵa Qazaqstannyń jaqsarǵany emes, shaıqalǵany paıdaly. Sebebi ózderiniń jeke basynyń paıdasyna, ıaǵnı "gýmanıtarlyq bıznesine" qarjy kerek," – dedi Edil Jańbyrshın.
Depýtat elimizdiń ishki saıasatyna syrtqy kúshterdiń aralasýyn shekteý úshin Úkimetke naqty sharalar qabyldaýdy usyndy:
- Qarjylyq baqylaý: Qarjy mınıstrligi men tıisti memlekettik organdar elimizdiń ishki saıasatyna aralasýǵa baǵyttalǵan syrttan quıylǵan qarjyny anyqtap, tıisti sharalar qabyldaýy tıis.
- Quqyqtyq taldaý: Shetelden qarjylandyrylatyn uıymdardyń qyzmetin retteıtin zańnamanyń tıimdiligine taldaý júrgizý qajet.
- Qatań baqylaý: Sheteldik granttar arqyly qarjylandyrylatyn jobalar men uıymdardyń qyzmetin baqylaý jáne retteý mehanızmderin jetildirý kerek.
- Ishki saıasat tujyrymdamasy: Memleket basshysynyń tapsyrmasyna sáıkes, elimizde tuńǵysh ret ishki saıasat tujyrymdamasy ázirlenedi. Bul qujat ulttyq qundylyqtarymyzdy negizge ala otyryp, elimizdiń ishki turaqtylyǵyn qamtamasyz etýi qajet.
Edil Jańbyrshınniń aıtýynsha, eger syrttan keletin qarajat el ekonomıkasyn damytýǵa, ekologııa men densaýlyq saqtaý salasyn jaqsartýǵa baǵyttalsa, oǵan eshqandaı kedergi bolmaýy tıis. Alaıda ishki saıasatymyzǵa qarsy, ulttyq múddemizge qaıshy, turaqtylyǵymyzǵa nuqsan keltiretin jobalardy qarjylandyratyn uıymdarǵa qatań tosqaýyl qoıý qajet.
