AQSh-tyń Mınnesota shtatyndaǵy Brýklın-Park qalasynda jeńil motorly SOCATA TBM 700 ushaǵy turǵyn úıge qulap, jarylyp ketti, dep habarlaıdy “Adyrna” ulttyq portaly ABC 7 arnasyna siltep.
Málimetterge súıensek, ushqysh pen jolaýshylar qaza tapqan.
Apat halyq kóp shoǵyrlanǵan aýdanda bolǵan. Abyroı bolǵanda, úıde eshkim bolmaǵandyqtan, jergilikti turǵyndar zardap shekpegen.
Ushaqta qansha adamnyń bolǵany naqty belgisiz, biraq ádette bul áýe kóligi alty adamǵa deıin tasymaldaýǵa eseptelgen.
Áýe kemesi Aıova shtatyndaǵy De-Moın halyqaralyq áýejaıynan ushyp shyǵyp, Mınneapolıs mańyndaǵy Anoka-Bleın okrýgine baǵyt alǵan.
Tergeýshiler apattyń tehnıkalyq aqaýlardan bolǵanyn nemese ushqyshtyń ushaqty ádeıi baǵyttaǵanyn anyqtaýda. Qazirgi ýaqytta oqıǵa ornynda jedel qyzmetter jumys istep jatyr.
