Sońǵy ýaqytta Qazaqstan batysynda drondardyń qulaýy jıiledi. Bul quraldardyń qaı elge tıesili ekendigi áli resmı túrde aıtylmady. Qatelik bolsa, keshirim suraǵan taǵy eshkim joq. Qazaqstan da ázirge áldebir elderdi aıyptap, sókpedi.
Batys Qazaqstan oblysy, Bókeı Ordasy aýdany Uıaly aýyldyq okrýgi mańyna eń birinshi 18 aqpan kúni dron qulaǵan bolatyn. Al 18 naýryz kúni Tasqala aýdanynyń Atameken aýylynyń mańyna pılotsyz ushý apparaty tabyldy. Naýryzdyń 24-i kúni Jánibek aýdanynda dron bólshekteri qulaǵany belgili boldy. Sońǵy bir aıdyń kóleminde bir emes, úsh birdeı dronnyń qulaýy kezdeısoqtyq pa, kezdeısoq bolsa, onyń sebeb nede? Oqıǵa ornyna baryp jaǵdaımen tanystyq degen depýtat joq. Degenmen bul týraly pikir bildire alatyn kimder bar, sózge tarttyq.
«ÁZIRGE BELGISIZ»
«Aýyl» partııasynyń atynan Májilis depýtaty bolǵan Erbolat Saýryqov halyqaralyq ister, qorǵanys jáne qaýipsizdik komıtetiniń múshesi retinde bul máselege erekshe nazar aýdaryp otyrǵanyn aıtady.
«Jalpy kez kelgen eldiń memlekettik turaqtylyǵy men táýelsizdigine baılanysty óziniń bekitilgen shekaralyq aımaqtary, onyń ishinde jerdegi, áýedegi jáne teńizdegi shekara aımaqtary bolady. Osyǵan baılanysty bóten qurylǵy, ne bolmasa ushaq pen drondar ózge eldiń terrıtorııasyna ótken jaǵdaıda oǵan baılanysty memleket, Qorǵanys mınıstrligi sekildi quqyq qorǵaý organdary ózderiniń jumystaryn júrgizý qajet», - deıdi ol.
Aıtýynsha, búgingi kúni ártúrli tosyn oqıǵalar bolyp jatyr. Sonyń biri Kaspıı munaı qubyryna shabýyl bolsa, taǵy biri osy – drondar.
«Bul oqıǵalar boıynsha búgingi tańda naqty bir resmı málimet joq.Málimet joqtyǵynyń ózi de talaı nárseni ańǵartady. Bálkim, áldebir uıym Reseı men Qazaqstan, ne bolmasa Ýkraına men Qazaqstannyń arasyna búlik salý úshin jasap otyrǵan dúnıe me? Ol jaǵy da ázirge belgisiz», - deıdi depýtat.
Erbolat Saýryqovtyń aıtýynsha, qaı memlekettiń dronnyń bolsa da, Qazaqstannyń terrıtorııasyna túsken jaǵdaıda sol memleket óziniń qatelikterin moınyna alyp, onyń ne sebepti Qazaqstan terrıtorııasyna kelip túskeni týraly aqparat berýi tıis.
«DRON BA, DRON EMES PE?»
«Aq jol» partııasynyń tóraǵasy, Májilis depýtaty Azat Perýashevtyń pikiri Erbolat Saýryqovpen úndes shyqty.
«Árıne, eń birinshi kezekte bizdiń jerimiz ben azamattarymyzdyń qaýipsizdigin qamtamasyz etý – memlekettiń eń alǵashqy mindetteriniń biri. Sondyqtan da bul oqıǵa alańdaýshylyq týdyryp otyr», - deıdi ol.
Onyń topshylaýynsha, bul oqıǵada belgisiz jaǵdaılar bar.
«Mysaly, kimniń drony jáne ol dron ba, dron emes pe? Meniń biletinim, birinshi ret naqty dron tabylǵan bolsa, odan keıingileri dronnyń bólshekteri sekildi. Sondyqtan buǵan baılanysty ózimizdiń kózqarasymyzdy bildirý úshin naqty aqparat shyqqanǵa deıin kútýimiz kerek. Osy máseleni bizdiń áriptesterimiz kótergen bolatyn. Biraq tıisti organdardan naqty aqparat túspeıinshe bul máselege asyqpaı qaraýymyz kerek», – deıdi ol.
«DRON SYNAQ ÓTKIZETIN JERDE DE QULAÝY MÚMKIN»
Al Batys Qazaqstan oblysynan majorıtarlyq saılaý júıesi boıynsha Májilis depýtaty bolǵan Abzal Quspan dron máselesiniń basqa qyryna mán berdi.
«Meniń saılanǵan óńirimde dron qulaǵan alǵashqy sátten bastap tıisti ýákiletti organdarmen baılanysta otyrmyn. Osy rette oqyrmandarǵa Batys Qazaqstan oblysynyń ornalasqan geografııalyq ereksheligin aıta ketken jón dep esepteımin. Batys Qazaqstan oblysy Qazaqstannyń Atyraý jáne Aqtóbe oblystarymen, al Reseıdiń 5 oblysymen shektesedi. Sondaı-aq Qazaqstannyń atalǵan oblysynan qaraǵanda Reseıdiń oblystary áldeqaıda jaqyn ornalasqan. Máselen, Aqtóbe men Atyraý oblysy Oral qalasynan 500 shaqyrym jerde bolsa, al Reseıdiń oblystary ortasha eseppen 200-250 shaqyrym jerde ornalasqan», - deıdi depýtat.
Depýtattyń degenine qaraǵanda, Batys Qazaqstan oblysy Reseıge ishkeri ornalasqan óńir bolǵandyqtan oǵan álemdegi geosaıası jaǵdaı áser etpeı qoımaıdy.
«Taǵy bir erekshelik – Batys Qazaqstan oblysynyń terrıtorııasynda Jánibek, Bókeı Ordasy jáne Jańaqala aýdandarymen shektesetin, Reseıdiń áskerı polıgony ornalasqan. Atalǵan jer Qazaqstannyń jeri bolǵanymen Reseıge arendaǵa berilgen. Erterekte qol qoıylyp uzaq merzimge berilip ketken. Qatelespesem 2029 jylǵa deıin qaıtarylý kerek. Al dron synaq ótkizetin jerde de qulaýy múmkin», - deıdi depýtat Abzal Quspan.
