20 naýryzdan bastap Óskemen qalasyndaǵy memlekettik organdar men bıýdjettik uıymdar jańa jumys kestesine kóshedi, dep habarlaıdy "Adyrna" ulttyq portaly.
Bul týraly qala ákimdiginde ótken jıynda Shyǵys Qazaqstan oblysy ákiminiń orynbasary Darhan Sapanov málimdedi.
Jańa kestege sáıkes, endi jumys kúni saǵat 08:00-de bastalyp, 17:30-da aıaqtalady, al túski úzilis 12:00-den 13:30-ǵa deıin belgilendi.
Bul ózgeris oblystyń barlyq qala jáne aýdanynda engizilip, turǵyndardyń ómir súrý sapasyn jaqsartýǵa yqpal etedi dep kútilýde.
Jańa jumys ýaqytyna kóshý máselesi boıynsha ótken jıynǵa memlekettik uıymdardyń ókilderin qosa alǵanda, 300-ge jýyq adam qatysty. Qatysýshylar jańa kesteniń tıimdiligin atap ótip, bul sheshimdi qoldaıtyndaryn bildirdi.
Óskemen – Shyǵys Qazaqstan oblysynda jańa jumys rejımin engizgen sońǵy qala boldy.
Shyǵys Qazaqstan oblysyndaǵy barlyq 11 aýdannyń jańa jumys kestesine aýysqany týraly jazǵan edik.
