AQSh-tyń Mıssýrı, Arkanzas jáne Mıssısıpı shtattarynda qatty daýyl men tornado oryn aldy, dep habarlaıdy "Adyrna" ulttyq portaly Fox News saıtyna silteme jasap.
Sońǵy málimetter boıynsha, 20-ǵa jýyq adam qaza taýyp, kóptegen turǵyn jaraqat alǵan.
Tabıǵı apat alǵash juma kúni Arkanzas pen Mıssýrıde bastalyp, keıin basqa aımaqtarǵa taraǵan. Kóptegen aýdandarda turǵyn úıler qırap, elektr jelileri úzilýde.
Lýızıana, Mıssısıpı jáne Alabama shtattarynda 50 000-nan astam tutynýshy jaryqsyz qaldy, keıbir óńirlerde tótenshe jaǵdaı jarııalandy. Qutqarýshylar zardap shekkender sany artýy múmkin ekenin aıtady.
Ulttyq meteorologııalyq qyzmettiń zertteýleri keıbir tornadolardyń jel jyldamdyǵy 265 km/saǵ deıin jetkenin kórsetti.
Sońǵy kúnderi AQSh-ta 30-dan astam tornado tirkelip, alty shtatqa zııan kelgen. Gýbernatorlar aımaqtardy qalpyna keltirýge birneshe aı qajet bolatynyn málimdedi.
Sarapshylardyń boljamy boıynsha, daýyl jeksenbi keshinde basylady.
