Memleket basşysy Qasym-Jomart Toqaev Qazaqstan halqyn amal merekesımen qūttyqtady. Būl turaly Aqorda jartialady, dep habarlaidy “Adyrna”.
“Qūrmettı otandastar! Sızderdı äz Nauryzdyŋ bastauy – Amal künımen şyn jürekten qūttyqtaimyn!
Amal kelgende amandyq bılısu – köne zamannan jalǧasqan airyqşa dästürımız.
Qystan şyǧyp, şuaqty köktemge aman jetken aǧaiyn osy künı bır-bırımen körısedı. Jastar ülkenderge sälem berıp, qariialardyŋ batasyn alady. Halqymyz ejelden osyndai ǧūryptar arqyly bauyrmaldyq pen janaşyrlyqty, tatulyq pen meiırımdılıktı därıptep, ūrpaqtyŋ boiyna asyl qasietterdı sıŋıre bılgen. Mūnyŋ bärı qazırgı Qazaqstannyŋ Adal azamat tūjyrymdamasymen tolyq ündesedı.
Bügınde Nauryz meiramy aldyndaǧy körısu ǧūrpy qaita jaŋǧyryp, jalpyūlttyq sipat ala bastady. Osy bıregei dästürımız elımızdıŋ yrysty yntymaǧy men berekelı bırlıgın nyǧaita tüsedı dep senemın.
Är şaŋyraq şattyq pen quanyşqa kenelsın! Barşaŋyzǧa zor densaulyq, baq-bereke tıleimın”, dedı prezident.
Aidan aman, jyldan esen bolaiyq! – dep jazdy Prezident qūttyqtauynda.
Ūqsas jaŋalyqtar
