14 naýryz kúni Qazaqstanda jalpyulttyq Naýryznama onkúndigi bastalady. Bıyl máni tereń Naýryz merekesi erekshe atalyp ótedi.
2024 jyly Memleket basshysy Qasym-Jomart Toqaevtyń bastamasymen Naýryz meıramyn toılaýdyń jańa formaty – Naýryznama onkúndigi, sondaı-aq merekeniń jańa logotıpi bekitildi.
«Naýryz» biryńǵaı logotıpindegi úsh qyzǵaldaq – ýaqyttyń úsh kezeńin, ıaǵnı elimizdiń keshegi tarıhyn, qazirgi damýyn jáne keleshek baǵdaryn beıneleıdi.
Tarıhı turǵydan, Naýryznama – myńjyldyqtardan bastaý alatyn halqymyzdyń mádenı murasy.
Qazaq mádenıetinde Naýryzdy toılaý dástúri eshqashan bir kúnmen shektelmegen. Eger Naýryz Ortalyq Azııada, Taıaý Shyǵysta, Kavkazda, Balqan elderinde halyqaralyq deńgeıde atalyp ótetin meıram bolsa, onda Naýryznama – keminde 8 kúnge sozylatyn Uly dalanyń halyqtyq merekesi. Bul týraly kezinde Abaı Qunanbaıuly, belgili etnograf-ǵalym Máshhúr Júsip Kópeıuly jazǵan.
Osylaısha, Naýryznama – jasandy jańashyldyq emes, kerisinshe, kópkúndik merekeleý arqyly onyń qyr-syryn ashyp, dástúrli sıpatyn damytýǵa baǵyttalǵan.
2024 jyly onkúndik aıasynda elimizde 800-den astam is-shara, sonyń ishinde kórmeler, festıvaldar, ádebı-mýzykalyq keshter, qaıyrymdylyq akııalary, mádenı-sporttyq is-sharalar uıymdastyryldy.
Biregeı mereke ártúrli jastaǵy jáne áleýmettik toptaǵy turǵyndardy ulttyq dástúr tóńiregine biriktirip, ózara túsinistik pen qurmet atmosferasyn qalyptastyrady.
Bereke men birliktiń merekesi Naýryz – ótken men búginniń, Qazaqstannyń túrli mádenıetteri men dástúrleriniń arasyndaǵy kópir. Memleket basshysy Qasym-Jomart Toqaev qazaqstandyqtardy Naýryz meıramymen quttyqtaýynda onyń mańyzyn erekshe atap ótti.
«Babalarymyz ejelgi zamannan beri Ulys kúnin jyl basy retinde atap ótken. Qazir Áz Naýryz kúlli halyqqa ortaq jalpyulttyq merekege aınaldy. Ony ultyna, dinine qaramastan barsha jurtymyz erekshe kútedi, birge atap ótedi», – dedi Prezıdent.
Naýryznamanyń árbir kúni qoǵam ómiriniń jekelegen aspektine arnalǵan. Bul merekeniń maǵynasy men mánin tereńdetýge múmkindik beredi. Jańarý jeke qarym-qatynastardan bastap qoǵamdyq qundylyqtarǵa deıingi barlyq salalardy qamtýy tıis.
«Kórisý – Amal merekesi» (aman-saýlyq surasyp, aǵaıynmen kezdesýler jáne ıgi tilekter kúni), «Qaıyrymdylyq» (qaıyrymdy ister kúni), «Mádenıet jáne ulttyq salt-dástúr» (ulttyq salt-dástúr men mádenıet kúni), «Shańyraq» (otbasy kúni), «Ulttyq kıim» kúni, «Jańarý» kúni, «Ulttyq sport» kúni, «Yntymaq» (birlik pen yntymaq kúni), «Jyl basy» jáne «Tazarý» kúni sııaqty taqyryptyq kúnder qazaqstandyq mádenıet pen qundylyqtardyń mańyzyn aıshyqtaıdy.
Naýryznama – el birligin nyǵaıtýdyń mańyzdy ishki faktory ǵana emes, sonymen qatar Qazaqstannyń syrtqy saıasattaǵy ustanymyn bekitýdiń mańyzdy elementi.
Baı tarıhy bar, jańarý men birliktiń sımvolyna aınalǵan Naýryznama Rıo-de-Janeıro karnavalyna, Japonııadaǵy sakýra gúldeýi merekesine, Úndistandaǵy Holı festıvaline, Germanııadaǵy Oktoberfestke, Ispanııadaǵy San-Fermın nemese Tomatına festıvalderine uqsas Qazaqstannyń negizgi týrıstik brendi bola alady.
Merekeniń onkúndik formaty festıval ıklin qurýǵa múmkindik beredi, onda kún saıyn týrısterge qazaqtyń salt-dástúrin, ulttyq taǵamdaryn, oıyndaryn, mýzykasyn, qolóneri men zamanaýı ónerin tanystyratyn jańa qyzyqty is-sharalar usynýǵa bolady.
Bıyl Naýryznama onkúndigi aıasynda elimiz boıynsha halyqtyń dástúrlerin, mádenıeti men tarıhyn nasıhattaýǵa baǵyttalǵan 1,5 myńnan astam is-shara ótkizý josparlanǵan.
Atap aıtqanda, Astana qalasynda «Qamajaı» fleshmoby, Aqmola oblysynda kreatıvti ındýstrııa ókilderi men qoldanbaly óner sheberleriniń qatysýymen «Naýryz – Arbat» jobasy, Kókshetaýda myńnan astam áıel qatysatyn «Kımeshekter sherýi», Aqtóbede «Ulttyq kıim – ult beınesi» atty ulttyq kıimder sherýi, halyqtyń ulttyq mádenıetke degen qyzyǵýshylyǵyn oıatýǵa baǵyttalǵan basqa da kóptegen aýqymdy is-sharalar ótedi.
