22 naýryz – Ulystyń uly kúninde Aqtaýda qazaq halqynyń ulttyq kıimi men salt-dástúrin álemge tanytý maqsatynda aýqymdy festıval ótedi, dep habarlaıdy "Adyrna" ulttyq portaly.
Mańǵystaý oblysynyń ákimdigi taratqan aqparatqa sáıkes, "Kazakh Record" festıvaline 5000-nan astam adam qatysady dep josparlanýda. Shara aıasynda qazaqtyń ulttyq kıimin Gınnes rekordtar kitabyna engizý úshin halyqaralyq komıssııa músheleri arnaıy Aqtaýǵa keledi.
Festıvaldiń maqsaty - qazaqtyń ulttyq kıimin nasıhattaý, tarıhı mura men mádenıetti dáripteý, jastardyń patrıottyq rýhyn kóterý men qazaqy salt-dástúrdi urpaqtan-urpaqqa jetkizý.
"Ulttyq qundylyqtardy álemge pash etkisi keletin barsha qazaqstandyqty Kazakh Record festıvaline shaqyramyz!" – delingen ákimdik habarlamasynda.
Aıta keteıik, buǵan deıin Kókshetaýda Naýryz meıramyna oraı "Kımeshek sherýi" uıymdastyrylatyny belgili bolǵan.
