Qostanaı oblysynda aınalma kanaldyń bitelýi saldarynan sý tasyp, zırattardy basyp qaldy. Oblystyq tótenshe jaǵdaılar departamenti jaǵdaıdy baqylaýǵa alǵanyn aıtty, dep habarlaıdy “Adyrna” ulttyq portaly.
Aqparatqa sáıkes, kanal 2024 jyly kóktemde Qarasý aýdanynda salynǵan. Biraq ol únemi bitelip qalatyn kórinedi. Turǵyndar kóktem kele sala sýdyń deńgeıi kóbeıip, aýyl sýdyń astynda qala ma dep qorqyp otyr.
Qostanaı oblysynyń tótenshe jaǵdaılar departamenti Qarasý aýdanyna qarasty Novoselovka aýylynda aýa temperatýrasynyń tómendeýine baılanysty drenajdyq arnada muz qabaty paıda bolyp, saldarynan sý aǵyp ketkenin habarlady.
“Sý zırat aýmaǵyna jetip, ishinara beıitti sý basqan. Qazirgi ýaqytta sý odan ári taraǵan joq. Jergilikti atqarýshy organdardyń kúshimen kanaldy tereńdetý jáne keńeıtý, sondaı-aq Qundyz ózenine ótkizý úshin muzdy qopsytý boıynsha ınjenerlik jumystar júrgizilýde. Mamandandyrylǵan tehnıkanyń alty birligi jumyldyryldy. Qutqarýshylardyń kúshimen jaǵdaıdy monıtorıngteý maqsatynda tehnıkamen aınalyp ótý júzege asyrylady. Jaǵdaı baqylaýda”, - dep habarlady Qostanaı oblysy TJD ókilderi.
