20 aqpanda Almatyda ótken Women in business forýmynda Halyk Bank basqarma tóraıymy Úmit Shaıahmetova el ekonomıkasy úshin áıelderdiń jumyspen qamtylýy men tabysynyń ósýi qanshalyqty mańyzdy ekenin atap ótti.
"Bizdiń bank áıelder kásipkerligin belsendi qoldaıdy. Biz osymen jetinshi ret "Bıznestegi áıelder" baǵdarlamasy aıasynda 1 mlrd teńge bóldik. Aıta ketý kerek, bul qarjylandyrý tek banktiń jeke qarajaty esebinen júzege asyrylady. Meniń oıymsha, elimizde belsendi, saýatty, bilimdi, isker jáne tabysty áıelder neǵurlym kóp bolsa, bizdiń qoǵam soǵurlym jaqsy bolady", - dedi Shaıahmetova.
Halyk tóraıymynyń aıtýynsha, bul bastama alǵash ret 2018 jyly iske asyrylǵan jáne jyl saıyn ótkizilip keledi. Aıta keteıik, osy ýaqyt ishinde elimizdiń ár óńirinen 600-den asa áıel Halyk Bank-ten 7 mlrd teńgege tıimdi sharttarmen ıaǵnı 6-8%-ben nesıe ala aldy.
Sondaı-aq, Úmit Shaıahmetova "Bıznestegi áıelder" baǵdarlamasyna qatysýshylardyń negizinen shaǵyn jáne orta bıznes ıeleri ekenin atap ótti. Onyń aıtýynsha, áıel kásipkerlerdiń basym bóligi qyzmet kórsetý jáne saýda salasynda jumys isteıdi. Kásipkerlerdiń arasynda jeńil jáne tamaq ónerkásibimen, sondaı-aq medıınalyq qyzmetpen aınalysatyndar da bar.
Eske sala keteıik, Halyk Bank ekonomıkanyń mańyzdy sektorlaryna belsendi túrde nesıe beredi. Bank portfelindegi qaryzdardyń 50%-dan astamy zańdy tulǵalarǵa tıesili. Bul nesıeler ekonomıkanyń barlyq derlik segmentterine, sonyń ishinde ónerkásip, baılanys, saýda, aýyl sharýashylyǵy jáne taǵy basqalaryna berilgen nesıeler.
