Toronto qalasyndaǵy Lester Pırson áýejaıynda Delta Airlines áýe kompanııasyna tıesili Mınneapolısten ushyp kelgen ushaq aýdarylyp ketti. Oqıǵa dúısenbi, 17 aqpan kúni ushaqtyń qonýy kezinde boldy, dep habarlaıdy “Adyrna” ulttyq portaly DW saıtyna siltep.
Aqparat kózderine súıensek, apattyń saldarynan segiz adam jaraqat alǵan. Olardyń úsheýi — bala jáne eki eresek jolaýshy — aýrýhanaǵa aýyr jaǵdaıda jetkizildi. Bombardier CRJ 900 ushaǵynda barlyǵy 76 jolaýshy men tórt ekıpaj múshesi bolǵan. Áýejaıdyń málimetinshe, mert bolǵan eshkim joq.
Delta Airlines ókilderi reıs Endeavor Air áýe kompanııasy tarapynan júzege asyrylǵanyn naqtylady. Ol kompanııanyń Mınneapolıste ornalasqan enshiles uıymy.
Áýejaıdan túsirilgen foto jáne vıdeo materıaldarda ushaqtan kóterilgen tútin klýbtary kórinedi, biraq iri órt týraly habarlanǵan joq. Al ushaqta bolǵan adamdar ózderi aýdarylǵan ushaqtan shyǵyp ketkenin jergilikti polıııa ókili Sara Patten Reuters agenttigine habarlady.
«Ushaq apaty boldy. Biraq qazirgi ýaqytta onyń sebebi týraly bizde aqparat joq. Meniń bilýimshe, jolaýshylardyń kóbisi ushaqtan shyǵyp, aman qaldy, biraq biz áli de osy jaǵdaıdy tekserip jatyrmyz, sondyqtan biz áli de oqıǵa ornynda tergeý júrgizýdemi», — dedi polıeı.
BAQ ókilderi sońǵy kúnderde Torontoda erekshe qarly boran bolǵanyn atap ótedi. Máselen, áýejaı mańynda ótken aptada 53,6 sm qar jaýǵan, bul sońǵy úsh aıdaǵy jalpy jaýǵan qar mólsherinen artyq.
Aıta ketsek, Bombardier — shaǵyn ushaqtar men bıznes-djetterdi shyǵaratyn kanadalyq óndiris kompanııasy, olar Soltústik Amerıkada óte tanymal. Sonymen qatar Bombardier ushaqtary keıbir eýropalyq áýe kompanııalarynyń áýe parkterinde de bar.
Qańtar aıynyń sońynda Vashıngton mańyndaǵy áýejaıda Bombardier CRJ700 ushaǵy apaty boldy. Ushaq qoný kezinde Black Hawk áskerı tikushaǵymen aýada soqtyǵysyp, eki ushaq ta Potomak ózenine qulaǵan. Barlyq jolaýshylar men ekıpaj músheleri qaza tapty. Ushaq jolaýshylarynyń arasynda birneshe burynǵy reseılik mánerlep syrǵanaýshylar bolǵan.
