Ishki ister mınıstrligi bıýdjetti únemdeý úshin sottalǵan áıelderge raqymshylyq jasaý bastamasyn qoldady. Buǵan deıin depýtat Qaraqat Ábden túrmedegi jazasy jeńil áıelderdiń merzimin qysqartýdy nemese túrmeden tolyq bosatýdy usynǵan edi, dep habarlaıdy «Adyrna» tilshisi.
Ishki ister mınıstri Erjan Sádenovtiń aıtýynsha, búgingi tańda 6399 áıel qylmystyq quqyq buzýshylyq jasaǵany úshin jazasyn ótep jatyr.
«Qazaqstan Respýblıkasy Qylmystyq kodeksiniń 78-babyna sáıkes, Aýyrlyǵy az jáne ortasha qylmystary úshin sottalǵan 1220 áıel jazasyn óteýden bosatylýy múmkin. Sonymen qatar, zorlyq-zombylyqqa baılanysty emes qylmystar jasaǵany úshin 2002 áıel sottaldy, olardyń 1766-sy alǵash ret, al 150-i aýyrlyǵy shaǵyn jáne ortasha qylmystar jasaǵan. Óz kezeginde aýyr jáne asa aýyr qylmystar jasaǵan 5055 áıelge jaza merzimin qysqartý múmkin»,—dedi ol.
IIM sottalǵandarǵa raqymshylyq berý arqyly bıýdjet shyǵynyn azaıtýǵa bolatynyn málimdedi.
«Osylaısha, eki myńnan astam sottalǵandy bosatý arqyly bıýdjetti kúnine 5,8 mln teńgege deıin únemdeýge bolady (1 sottalǵan adamǵa kúnine – 2900 teńge, tıisinshe jylyna 2,1 mlrd teńge jumsalady). Bul shara gýmanızm qaǵıdattaryn, memlekettiń áleýmettik saıasatyn qoldaýdy, áıelderdi beıimdeýdi, olardyń otbasylyq qundylyqtaryn nyǵaıtýdy jáne balalardyń quqyqtaryn saqtaýdy, sondaı-aq QAJ túzeý mekemelerinde óteýshilerdiń júktemesin azaıtý esebinen memlekettik shyǵystardy ońtaılandyrýdy jáne sottalǵandardy QAJ mekemelerinde ustaý jaǵdaılaryn jaqsartýdy kózdeıdi»,— delingen habarlamada.
