Shaıbaly hokkeıden Qazaqstan chempıonatynyń sońǵy oıyny jappaı tóbelespen aıaqtaldy. Bul týraly ınstagramdaǵy «Golovoı ob led» arnasynda vıdeo tarady, dep habarlaıdy “Adyrna” ulttyq portaly.
Aqparatqa sáıkes, "Beıbarys" pen "Arlan" (0:4) arasyndaǵy match barysynda bir ret ǵana tóbeles bolǵan. Biraq tóreshi ysqyryǵy estilgennen keıin qos komandanyń hokkeıshiler ǵana emes, tipti jattyqtyrýshylar men klýb qyzmetkerleri de bir-birine narazylyq bildirdi. Munyń sońy jappaı tóbeleske ulasty.
Jelige taraǵan vıdeoda ádiletsiz sheshimmen kelispegen klýb qyzmetkerleriniń biri oıynshylardy sabyrǵa shaqyrýdyń ornyna olarmen birge tóbeleske kiriskeni kórinedi.
“Qyzmetkerlerdiń biri (qaı klýbtyń ekeni ázirge belgisiz) oıynshylardy tynyshtandyrýdyń ornyna, qulap jatqan hokkeıshini urady. Bul durys emes, biz bul áreketti qate dep esepteımiz”,- dep jazady arna.
