14 aqpan kóbine Áýlıe Valentın kúni nemese ǵashyqtar kúni retinde tanymal. Alaıda, sońǵy jyldary bul kúndi kitap syılaý merekesi retinde toılap júrmiz. Bul merekeniń bastaýy qaı kezden beri bar?
2012 jyldan bastap jyl saıyn 14 aqpanda Halyqaralyq kitap syılaý kúni (International Book Giving Day) atalyp ótedi. Bul mereke kitaptardy balalarǵa syılap, olardyń oqýǵa degen súıispenshiligin arttyrýǵa baǵyttalǵan.
Keıbir merekeler BUU nemese basqa halyqaralyq uıymdardyń bastamasymen paıda bolsa, keıbiri memlekettik, dinı nemese kásibı meıramdar bolyp tabylady. Al «Halyqaralyq kitap syılaý kúni» – halyq arasynan shyqqan erekshe mereke. Ony alǵash ret amerıkalyq Emmı Brodmýr – balalarǵa arnalǵan kitap saıtynyń negizin qalaýshy – bastama retinde kótergen.
Emmı Brodmýr úsh balanyń anasy bolǵan. Bir kúni uly odan: «Nege adamdar bir-birine kitap syılaıtyn arnaıy kún joq?» – dep suraǵan. Osy saýal ony oılandyryp, 2012 jyly Emmı óziniń bloger dostary, áleýmettik jelidegi tanystary jáne áriptesteri arqyly Halyqaralyq kitap syılaý kúnin uıymdastyrýdy qolǵa alady.
Balanyń qarapaıym suraǵy men anasynyń bastamasy búkil álemge tarap, mıllıondaǵan adamnyń qoldaýyna ıe boldy. Osylaısha, 14 aqpan tek ǵashyqtar ǵana emes, kitap súıer qaýym úshin de erekshe kúnge aınaldy.
14 aqpanda adamdar kitaptardy negizinen balalarǵa, sondaı-aq kitap oqýǵa múmkindigi shekteýli jandarǵa syıǵa tartady. Biraq kitap oqýdy jaqsy kóretinder tek balalar emes. Búginde kóptegen eresekter kitaptyń rýhanı qundylyǵyn, onyń adamǵa beretin áserin, avtor jetkizgen emoııalar men oılardyń mańyzdylyǵyn túsinedi.
Balalar úshin kitap – tek bilim kózi ǵana emes, sonymen qatar olardy meıirimdilikke, dostyqqa, bir-birine kómektesýge, jaqyndaryna degen súıispenshilikke jáne janashyrlyqqa úıretetin qural. Al osy qasıetter olardy shynaıy adam bolýǵa jeteleıdi.
Bul merekeni uıymdastyrýshylar kitaptyń mańyzdylyǵyn esten shyǵarmaýǵa shaqyrady. Ókinishke qaraı, álemde áli kúnge deıin kitap oqýǵa múmkindigi joq adamdar bar. Keıbireýleri qarjylyq qıyndyqtarǵa baılanysty, al keıbireýleri áleýmettik jaǵdaıyna baılanysty kitapqa qol jetkize almaıdy.
Jetimhanalar, balalar úıleri, arnaıy ınternattar men aýrýhanalarda ómir súrip jatqan balalar úshin kitap úlken qýanysh syılaı alady. Úıińizde siz oqyp bitirgen nemese balalaryńyzǵa qajetsiz bolyp qalǵan kitaptar bolsa, olardy osyndaı mekemelerge syıǵa tartý – ıgi is.
Qazirgi zamanda gadjetter adamnyń basty serigine aınalǵanymen, kitap oqýdyń orny bólek. Kitap – tek aqparat kózi ǵana emes, adamnyń oılaý qabiletin damytatyn, rýhanı baıytatyn, jańa álemderge jol ashatyn erekshe qural.
Sondyqtan 14 aqpanda jaqyndaryńyzǵa nemese kitapqa muqtaj jandarǵa bir kitap syılap kórińiz. Múmkin, dál sizdiń syılyǵyńyz bireýdiń ómirin ózgertetin shyǵar!
Anel Álimbekqyzy
