Ózbekstan aýǵan ushqyshtary Kabýldan minip qashqan tikushaqtardyń bir bóligin AQSh-qa jiberdi. Bul sheshim «Talıban» qoǵalysy ókilderi basqaryp otyrǵan Aýǵanstan qorǵanys mınıstrliginiń narazylyǵyn týdyrdy, dep habarlaıdy «Adyrna» tilshisi.
Mınıstrlik málimdemesinde tikushaqtar Aýǵanstannyń menshigi ekeni jáne olardy keri qaıtarý kerektigi aıtylǵan.
«Islam ámirligi bul jaǵdaıǵa alańdaýshylyq bildirip otyr, óıtkeni tikushaqtar Aýǵanstanǵa tıesili. Olar burynǵy sheneýnikter elden qashyp bara jatqan kezde Ózbekstannyń áýe keńistigine ótip ketken bolatyn. Bul tikushaqtardy AQSh-qa berýdi negizsiz dep sanaımyz. Biz óz múddelerimizdi qorǵaýǵa quqylymyz. Kórshi elder de aýǵan halqynyń quqyǵyn qurmetteýi tıis»,—delingen habarlamada.
Tálipter AQSh-ty kedergi jasamaýǵa, kerisinshe, tehnıkany Aýǵanstanǵa qaıtarýǵa kómektesýge shaqyrdy.
Buǵan deıin Ózbekstan AQSh-qa jeti Black Hawk tikushaǵyn jibergeni belgili bolǵan edi. 2021 jylǵy tamyzda olarǵa aýǵan ushqyshtary minip, elden qashqan bolatyn.
