Premer-mınıstrdiń orynbasary – ulttyq ekonomıka mınıstri Serik Jumanǵarın Qazaqstan úkimetine memlekettik bıýdjetti ońtaılandyrýda Ilon Masktyń ıdeıasyna uqsas usynystyń aıtylǵanyn málimdedi, dep habarlaıdy "Adyrna" ulttyq portaly QazTAG-qa siltep.
Mınıstrdiń aıtýynsha, bul usynys Tramp ákimshiliginiń tájirıbesine súıene otyryp jasalǵan.
"Maǵan prezıdent Tramp ákimshiliginde Ilon Mask myrza júrgizip jatqan jumys sııaqty ıdeıa usynylǵanyn jasyrmaımyn. Ol jaqta memlekettik basqarý tıimdiligi departamenti bar. [Qazaqstan azamaty] óz qyzmetin usyndy, ıdeıalary baryn aıtty. Men ony shaqyrdym, "kel, birge jumys isteıik, jumys tobyn quraıyq" dep aıttym”, – dedi Jumanǵarın beısenbi kúni senattyń kýlýarynda.
Sonymen qatar, mınıstr jańa Salyq kodeksine sáıkes, iri bızneske arnalǵan jeńildikterdiń qysqartylatynyn atap ótti.
2025 jylǵy respýblıkalyq bıýdjet bastapqyda 32 trıllıon teńge kóleminde josparlanǵan, biraq qazirgi ýaqytta 25,7 trıllıon teńgege deıin qysqartylǵan.
"Bıýdjetti bekitý barysynda 6 trıllıon teńge qysqartyldy. Ákimshilik bıýdjettik baǵdarlamalar arqyly 400 mıllıard teńge únemdeldi. Qazir biz áleýmettik shyǵyndardy muqııat taldaýdamyz, sebebi respýblıkalyq bıýdjet boıynsha onyń úlesi – 37,5%, al jalpy bıýdjette 50%-ǵa jetedi", – dep túsindirdi Jumanǵarın.
