Qaskeleŋ men Almaty arasyndaǧy jol 8 jolaqqa deiın keŋeitıledı

Qaskeleŋ men Almatyny jalǧaityn jol 4-ten 8 jolaqqa deiın keŋeitıledı, dep habarlaidy "Adyrna" ūlttyq portaly Almaty.tv-ǧa sılteme jasap.  Joldyŋ keŋeitıluı nätijesınde atalmyş uchaskeden kün saiyn 90 myŋǧa juyq kölıktıŋ emın-erkın ötuı üşın jaǧdai jasalmaq. Al qazır būl jolmen täulıgıne 60 myŋnan asa temır tūlpar qatynaidy. Uaqytty ünemdeuge, kölık qatynasyn jaqsartuǧa septıgın tigızetın jobanyŋ qūrylysy ekı kezeŋde jürgızıledı. Bırınşı kezeŋde Ülken Almaty ainalma avtomobil jolynan Qaskeleŋge deiıngı uchaske, ekınşı kezeŋde Qaskeleŋ ötkelınen Äitei auylynyŋ būrylysyna deiıngı aumaq qamtylmaq. "Qazırgı taŋda Almaty-Bışkek respublikalyq maŋyzy bar avtomibil jolynyŋ 19 jäne 27-şaqyrym aralyǧynda kürdelı jöndeu jūmystary boiynşa jobalyq-smetalyq qūjat jasap jatyrmyz. Atalǧan jobada 4 jolaqtan 8 jolaqqa deiın joldy keŋeitu közdelıp otyr. Sonymen qatar 2 jolairyǧyn sol jobaǧa qosatyn bolamyz. Sonymen qatar 12-ge juyq jaiau jürgınşıler ötkelın salu josparlanuda", - dedı "QazAvtoJol" ŪK" AQ Almaty oblystyq filialynyŋ bölım basşysy Janat Ötepbergenov.